އިޒްރޭލު މާގިނަ ދުވަހަކަށް ދެމިއެއް ނޯންނާނެ ކަމަށް އިރާނުގެ ރޫހާނީ ލީޑަރު އަލީ ހާމަނާއީ ވިދާޅުވެއްޖެ އެވެ.
އިރާނުގެ ވެރިރަށް ތެހްރާންގައި މިއަދު ކުރި ހުކުރު ނަމާދުގައި ހުތުބާ ދެއްވީ ހާމަނާއީ ކަމަށްވާއިރު، މިއީ ގިނަ އަހަރުތަކަކަށް ފަހު އޭނާ ހުތުބާއެއް ދެއްވި ފުރަތަމަ ފަހަރެވެ. އެންމެފަހުން ހާމަނާއީ މިފަދަ ގޮތަކަށް ހުކުރު ހުތުބާއެއް ދެއްވީ 2020 ވަނަ އަހަރު އެވެ.
ހާމަނާއީ ވިދާޅުވީ އިޒްރޭލާއި ދެކޮޅަށް މަސައްކަތް ޖަމާއަތްތަކުގެ ލީޑަރުން ޝަހީދުކޮށްލި ނަމަވެސް އެ ޖަމާއަތްތަކުން ފަހަތަށް ނުޖެހޭނެ ކަމަށާއި ދާދިފަހުން އިރާނުން އިޒްރޭލަށް ދިން ހަމަލާއަކީ ލެޔަށް ދަހިވެތިވެފައި ތިބި ޔަހޫދީން ހިންގާ ޖަރީމާތަކުގެ ބަދަލުގައި ދެވުނު ހައްގު ހަމަލާއެއް ކަމަށެވެ. އަދި އިޒްރޭލަށް ހަމާސް ޖަމާއަތާއި ހިޒްބުﷲ ޖަމާއަތް ބަލިކަށިކޮށް ނުލެވޭނެ ކަމަށާއި އިޒްރޭލު މާގިނަ ދުވަހަކަށް ދެމިއެއް ނޯންނާނެ ކަމަށްވެސް ހާމަނާއި ވިދާޅުވި އެވެ.
ގިނަ އަދަދެއްގެ ބަޔަކު ބައިވެރިވި ހުކުރު ނަމާދުގައި ދެއްވި ހުތުބާގައި ހާމަނާއީ ވަނީ އިޒްރޭލާ ދެކޮޅަށް މަސައްކަތް ކުރަން މުސްލިމު ގައުމުތަކުން އެއްބައިވަންތަވުމަށް ވެސް ގޮވާލާފަ އެވެ. އެގޮތުން މުސްލިމުންގެ ދުޝްމަނުންނަކީ އެއް ބައެއްކަން ހަނދާނުގައި ބަހައްޓަންޖެހޭ ކަމަށާއި އިޒްރޭލުން ގެންގުޅޭ ސިޔާސަތަކީ ގައުމުތަކުގައި ބައިބައިވުން އުފެއްދުމަށް ފަހު އެގައުމުތަކަށް އަތްގަދަކުރުން ކަމަށްވެސް ވިދާޅުވި އެވެ.
އިރާނުން ދާދިފަހުން ވަނީ އިޒްރޭލުގެ މެދުތެރޭގެ ހިސާބުތަކަށް އަމާޒުކޮށް 200 އަށް ވުރެ ގިނަ ވައިގެ ހަމަލާ ފޮނުވާލާފަ އެވެ. މިއީ ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އާއި ލުބްނާނުގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލުމުގެ ބަދަލެއްގެ ގޮތުން ދިން ހަމަލާއެއް ކަމަށް އިރާނުން ވަނީ ބުނެފަ އެވެ.
އިޒްރޭލުން ވަނީ މި ހަމަލާގެ ރައްދު ރަނގަޅު ވަގުތެއްގައި އިރާނަށް ދޭނެ ކަމުގެ އިންޒާރު ދީފަ އެވެ.