އައްޑޫގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީން އިންތިޒާމުކޮށްގެން މިހާރު ކުރިއަށް ގެންދާ "އަފިރިންގެ އެކްސްޕޯ" އަށް ޒިޔާރަތްކުރާ މީހުންނަށް ގުރުއަތުން އިނާމުތަކެއް ލިބޭނެ ކަމަށް ބުނެފި އެވެ.
މާދަމާ ނިންމާ ގޮތަށް ހަމަޖެހިފައިވާ އެކްސްޕޯގައި ވަނީ ތިން އިނާމެއް ހާއްސަކޮށްފައިވެ އެވެ. އޭގެ ތެރޭގައި ގްރޭންޑް ޕްރައިޒަކަށް ހިމަނާފައި ވަނީ އުމްރާ ދަތުރެކެވެ. އަދި ތިން ފަރާތަކަށް ފައިސާގެ އިނާމު ވެސް ދޭން ހަމަޖެހިފައިވާ އިރު، އިނާމުގެ ތެރޭގައި ރިސޯޓެއްގައި ޗުއްޓީ ހޭދަކޮށްލުމުގެ ފުރުސަތު ހިމެނެ އެވެ.
މި އިނާމުތައް ލިބޭ ނަސީބުވެރިން ހޮވާނީ "އަފިރިންގެ އެކްސްޕޯ" އަށް ޒިޔާރަތްކުރާ މީހުންގެ މެދުގައި ނަގާ ގުރުއަތުލުމަލުންނެވެ.
އިއްޔެ ހަވީރު ފެށި އެކްސްޕޯ ކުރިއަށް ދަނީ ހިތަދޫ ނޫރާނީ ސްކޫލްގަ އެވެ.
"އަފިރިންގެ އެކްސްޕޯ" ގައި އައްޑޫގެ ވަރަށް ގިނަ މަސައްކަތްތެރިންގެ މަސައްކަތްތަކާއި އުފެއްދުންތައް ބައިވެރިކޮށްފައިވެ އެވެ. އަދި މިއީ އެތައް ބައެއްގެ މަސައްކަތްތަކާއް އުފެއްދުންތައް އެއް ތާކުން ދައްކާލައި، އުފެއްދުންތަކަށް މާކެޓެއް ހޯދައި ދޭން އިންތިޒާމުުރި އެކްސްޕޯއެކެވެ.
އެކްސްޕޯ އިން ތަކެތި ގަތުމުގެ ފުރުސަތު އޮންނާނެ އެވެ. އަންހެނުންގެ ކޮމިޓީން ވަނީ ވީހާ ވެސް ގިނަ ބަޔަކު މި އެކްސްޕޯ އަށް ކުރިއަށްދާ މުއްދަތުގެ ތެރޭގައި ޒިޔާރަތްކުރަން އެދިފަ އެވެ.
"އަފިރިންގެ އެކްސްޕޯ" ގެ ޕާޓްނަރުމްގެ ތެރޭގައި އެސްޓީއޯ އާއި ސައުތު ޕާމް ރިސޯޓާއި ކެނަރީފް ރިސޯޓާއި ގަމުގެ އީކްއޭޓަ ވިލެޖާއި އެލިއާ ސްޓޯރާއި ޓޯޓަލް ޓޫލްސްގެ އިތުރުން ދަތުރުވެރިޔާ އުމްރާ ގްރޫޕް ހިމެނެ އެވެ.