ދުނިޔޭގެ ބައެއް ހިސާބުތަކުގައި މިހާރު ބާރަށް ފެތެރެމުން އަންނަ މަންކީޕޮކްސް ނުވަތަ އެމްޕޮކްސް އަށް ވަރަށް އަވަހަށް ދެނަގެނެވޭ ޓެސްޓް ކިޓަކަށް ޑަބްލިއެޗްއޯ އިން ހުއްދަ ދީފަ އެވެ.
އެބޮޓް މޮލެކިއުލާ އިން އުފައްދާފައިވާ އަދި "އެލިމިޓީ އެމް އެމްޕީއެކްސް އެސޭ" ގެ ނަން ދީފައިވާ މި ޕީސީއާރް ޓެސްޓް ކިޓަކީ ޑީއެންއޭ ސާމްޕަލް ނަގައިގެން ބައްޔަށް ޑައިގްނޯޒްވެފައިވޭތޯ ނޫންތޯ ދެނެގަނެވޭ ކިޓެކެވެ. ދުނިޔޭގެ ސިއްހަތު ޖަމިއްޔާ އިން ބުނީ އެމްޕޮލްސް ބާރަށް ފެތުރެމުންދާ އިރު، މުޅިން އަލަށް ހުއްދަ ދިން ޓެސްޓް ކިޓަކީ އެ ބައްޔާ ދެކޮޅަށް ކުރެވޭ މަަސައްކަތްތަކަށް ލިބުނު ވަރަށް ބޮޑު ކުރިއެރުމެއް ކަމަށެވެ.
އެގޮތުން ބަލި އަވަހަށް ދަނެގަނެވި، އަވަހަށް ފަރުވާ ހޯދުމުގެ ފުރުސަތު މީގެ ސަބަބުން ފަހިވެގެން ދާނެ ކަމަށް އެ ޖަމިއްޔާ އިން ބުންޏެވެ
މިހާތަނަށް އެމްޕޮކްސް އަށް ޓެސްޓް ކުރަނީ ސާމްޕަލްސް ނަގައިގެން ލެބޯރެޓަރީތަކަށް ފޮނުވައިގެންނެވެ. މީގެ ސަބަބުން ނަތީޖާ ލިބެން ދުވަސްތަކެއް ނަގަ އެވެ.
ޑަބްލިއުއެޗްއޯގެ އެސިސްޓެންޓް ޑިރެކްޓަރު ޖެނެރަލް ޔުކީކޯ ނަކަޓާނީ ވިދާޅުވީ އެމްޕޮކްސް އަށް ޓެސްޓްކުރެވޭ ޓެސްޓް ކިޓަކީ މި ދަނޑިވަޅުގައި އެމްޕޮކްސް ބައްޔަށް ލިބުނު ވަަށް ބޮޑު ކުރިއެރުމެއް ކަމަށާއި މީގެ ސަބަބުން ވަރަށް ހެޔޮ ބަދަލުތަކެއް އަންނާނެ ކަމަށެވެ.
އެމްޕޮކްސް މިހާރު އެންމެ ބޮޑަށް ފެތުރެމުން ދަނީ އެފްރިކާގެ ގައުމުތަކުގަ އެވެ. އެގޮތުން އެ ބައްރުގެ ގައުމުތަކުން ބަލި ޖެހުނު މީހުންގެ އަދަދު މިހާރު 30،000 އަށް ވުރެ ގިނަ އެވެ. އަދި ބަލީގައި މަރުވި މީހުންގެ އަދަދު 800 އަށް ވުރެ ގިނަ އެވެ.
އެފްރިކާގެ ގައުމުތަކުގެ ތެރެއިން އެމްޕޮކްސްގެ ހާލަތު އެންމެ ގޯހީ ކޮންގޯ އެވެ. މިއަދުން ފެށިގެން އެ ގައުމުގައި އެމްޕޮކްސް ވެކްސިން ޕްރޮގްރާމެއް ފަށަން ވެސް ވަނީ ނިންމައިފަ އެވެ.
އެފްރިކާގެ އިތުރުން ދުނިޔޭގެ ބައެއް ގައުމުތަކުން ވެސް އެމްޕޮކްސްގެ ކޭސްތަކެއް ދާދި ފަހުން ފެނިފައިވެ އެވެ.