ބޮލީވުޑްގެ ތަރި ރަންވީރު ސިންގް މިހާރު ކުޅެމުން އަންނަ ފިލްމު "ދުރަންދާރު" ގެ ބަތަލާ އަކީ ސާރާ އަރުޖުން ކަމަށް ރިޕޯޓްތައް ބުނެފި އެވެ.
އުމުރުން މިހާރު 20 އަހަރުގެ ބަތަލާ އަކީ ބޮލީވުޑްގެ ފިލްމުތަކުގެ އިތުރުން އިންޑިއާގެ ދެކުނު ފިލްމުތަކުގައި ވެސް މަސައްކަތް ކުރަމުން އަންނަ ބަތަލާއެކެވެ. މީޑިއާތަކުން ބުނީ "ދުރަންދާރު" ގައި ރަންވީރުގެ ބައިވެރިޔާގެ ރޯލުން ސާރާ ފެންނާނެ ކަމަށާއި ނަމަވެސް އޭނަގެ ކެރެކްޓާއާ ބެހޭ މާ ބޮޑު ތަފުސީލެއް އަދި ލިބިފައި ނުވާ ކަމަށެވެ.
ސާރާ އެންމެ ފަހުން ފެނިފައި ވަނީ ތަމަޅަ ޑައިރެކްޓަރު މަނީ ރަތުނަމް ދެ ބަޔަކަށް ގެނެސްދިން "ޕޮނިޔިން ސެލްވަން" އިންނެވެ. އޭނަގެ ކުރިއަށް އޮތް ފިލްމަކީ ތަމަޅަ ފިލްމު "ކޯޓޭޝަން ގޭންގް" އެވެ. ސާރާ ކުޅެފައިވާ ހިންދީ ފިލްމުތަކުގެ ތެރޭގައި "ސާންޑް ކީ އާނކް"، "އޭކް ލަޅުކީ ކޯ ދޭކާ ތޮ އޭސާ ލަގާ"، "ޖަޒްބާ" އަދި ޖޭ ހޯ" ހިމެނެ އެވެ.
ވަރަށް ބޮޑު މަގުބޫލު ކަމެއް ހޯދި 2019 ގެ ފިލްމު "އުރީ: ދަ ސާޖިކަލް ސްޓްރައިކް" ގެ ޑައިރެކްޓަރު އަދިތިޔާ ދާރު ޑައިރެކްޓްކުރާ "ދުރަންދާރަ" އަކީ މަޝްހޫރު ގިނަ އެކްޓަރުންތަކެއް ހިމެނޭ ވަރުގަދަ އެކްޝަން ފިލްމެކެވެ. މީގެ ކާސްޓްގައި ސަންޖޭ ދަތު، އަރުޖުން ރާމްޕާލް، އާރް މާދުވަން އަދި އަކްޝޭ ކަންނާނެ ހިމެނެ އެވެ.
ޖުލައި މަހުުގެ ތެރޭގައި ޝޫޓިން ފެށި "ދުރަންދާރު" ގެ މަސައްކަތް އަންނަ ޖެނުއަރީ އަށް ނިންމަން އަމާޒު ހިފާފައިވާ އިރު، ބެލުންތެރިންނަށް ފިލްމު ގެނެސްދޭނީ އަންނަ އަހަރުގެ މެދުތެރޭގަ އެވެ.