ރައީސް ޑރ. މުހައްމަދު މުއިއްޒުގެ ރޯލް މޮޑެލް އަކީ މިހާރު ރައްޔިތުންގެ މަޖިލީހުގެ ރައީސްގެ މަގާމުގައި ހުންނެވި އަބްދުއްރަހީމު އަބްދުﷲ ކަމަށާއި ހައްދަވަނީ ވެސް މުޅިން ދޮގު ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ރާއްޖެ އިސްލާމްވީ ދުވަސް ފާހަގަކުރަން މިއަދު ބޭއްވި ޖަލްސާގައި ރައީސް ދެއްކެވި ވާހަކައިގައި ވިދާޅުވީ ނަމޫނާ ލިބިގަންނަންވީ ރަސޫލުﷲ ޞައްލަﷲ ޢަލައިހިވަސައްލަމަ ދުނިޔެއަށް ގެނެސްދެއްވި މޫރިތި ރިވެތި އަހުލާގީ ސިފަފުޅުތަކުން ކަމަށެވެ. އެގޮތުން ދޮގު ހެދުމާއި ދޮގު ޚަބަރުފެތުރުމާއި އާޑަ ފުރައްސާރައިގެ ފިތުނަވެރި އަމަލުތަކުގައި ބައިވެރި ނުވާން ޢަޒުމު ކަނޑައެޅުމަށާއި ރަނގަޅު ވާހަކައެއް ނޫނީ ނުބުނުމަށް ސުންނަތުން އިރުޝާދު ލިބޭ ކަމަށް ރައީސް ވިދާޅުވި އެވެ.
އެ މަނިކުފާނުގެ މި ވާހަކަތަކަށް ސޯޝަލް މީޑިއާ ޕޯސްޓެއްގައި ރައްދު ދެއްވައި ޖަމީލު ވިދާޅުވީ ތިމާ އަމިއްލަ ނަފްސު އިސްލާޙުކޮށް އާންމު ރައްޔިތުންނަށް ނަމޫނާއަކަށް ވާން ޖެހޭ ކަމަށެވެ. އަދި މަގާމުގައި ހުންނެވީތީ ކޮންމެ ވާހަކައެއް ވެސް ދެއްކިދާނެ ކަމަށާއި ހުސްގޮނޑި އާއި ކުރީގެ ރައީސް އަބްދުﷲ ޔާމީން މިނިވަން ކުރުމާއި އިންޑިއާ ސިފައިން ރާއްޖެ އިން ފޮނުވާލުމާއި ގެއްލުނު ކަނޑާއި މާލޭ ރައްޔިތުންގެ ފްލެޓްތަކާއި ބިންތަކާއި ތިން ބްރިޖާއި ރަސްމާލެ ޓަނަލާއި ވައުދު ފޮތަކީ
ރައީސް މުއިއްޒު އުފަންކުރައްވައި ފަތުރައްވަމުން ގެންދަވާ ދޮގުތަކުން ބައެއް ކަމަށް ޖަމީލު ވިދާޅުވި އެވެ.
"މަނިކުފާނުގެ ސަބަބުން ދޮގާ މަކަރު ހެދުން އެއީ މިއަދު ގައުމީ ރުކުނަކަށް ވެއްޖެ،" އޭނަ ވިދާޅުވި އެވެ. "މަނިކުފާނުގެ ރޯލް މޮޑެލްއަކީ އަދުރޭ. ވައްކަން، ހުތުރު އެއްޗެހި ކިއުން އެއީ ތިޔަ ސަގާފަތުގެ ސުންނަތް."