ޓޫރިޒަމް މިނިސްޓަރު އިބްރާހީމް ފައިސަލް މާލެއިން ބިމެއް ބައްލަވައިގަތް ވާހަކަ މިނިސްޓަރު ދޮގު ކުރައްވައިފި އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގެ ދަރިކަލުން މާލެ އިން ބިމެއް ގަތް ކަމަށް މިދިޔަ ބުރާސްފަތި ދުވަހުގެ ރޭ ޕީއެންފުން ބޭއްވި ޖަލްސާގައި ކުރީގެ ރައީސް އަބްދުﷲ ޔާމީން ވިދާޅުވުމާ ގުޅިގެން ފައިސަލް ފޭސްބުކް ޕޯސްޓެއްގައި ވިދާޅުވީ އޭނަ މާލެ އިން ބިމެއް ގަތް ކަމަށް ވިދާޅުވެ ކުރީގެ ރައީސް ޔާމީން ދައްކަމުން ގެންދަވަނީ ރޯބުހުތާނު ދޮގު ވާހަކައެެއް ކަމަށެވެ.
"އެ ފަދަ ދޮގު ވާހަކަތައް ދެއްކުން ހުއްޓާލެއްވުމަށާއި ރައްޔިތުންގެ މެދުގައި ފިތުނަ ފަސާދަ އުފައްދުމަށް މަސައްކަތް ނުކުރެއްވުމަށް ރައީސް ޔާމީނަށް މި ފުރުޞަތުގައި ނަސޭހަތްތެރިވަން." ފައިސަލް ވިދާޅުވި އެވެ.
ރައީސް ޔާމީންގެ ޕާޓީ އަކީ ފައިސަލާއި އޭނަގެ ބައްޕަ އަބްދުއްރަހީމަށް ވަރަށް ބޮޑަށް ފާޑިކިޔައި ބަހުގެ ހަމަލާތައް ދޭ ބަޔަކު އުޅޭ ޕާޓީއެކެވެ. އޭގެ ތެރޭގައި ކުރީގެ ރައީސް ޑރ. މުހައްމަދު ޖަމީލު އަހުމަދާއި ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް ޖަމާލު ހިމެނެ އެވެ.