މި ސަރުކާރުން މުޅި ގައުމުގައި ވައްކަމާއި ފަސާދަ އާންމުކޮށްފައިވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އަމީރު މިހެން ވިދާޅުވީ ދޮގާއި ދޮގު ހަބަރު ފެތުރުން އޮތީ ދިވެހިންގެ ތެރޭގައި މޫލާފައި ކަމަށާއި އޭގެ ސަބަބުން ދައުލަތަށް ބޮޑެތި ގެއްލުންތަކެއް ލިބެމުންދާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވުމާ ގުޅިގެންނެވެ.
އެކަމާ ގުޅިގެން އަމީރު ވިދާޅުވީ ދޮގާއި މަކަރާއި ހީލަތުން އަދި އެހެން މީހުންގެ ނަފުސު ކަތިލައިގެން، ވެރިކަމަށް އައި ބަޔަކު ދައްކަން އެއީ ވަރަށް ރަނގަޅު ވާހަކައެއް ކަމަށެވެ. ވެރިކަމަށް އަހަރު ވެގެންދާއިރު ވައުދުވި އެއްވެސް ކަމެއް ބުނިގޮތަށް ނުދާ ކަމަށާއި މުޅި ޤައުމުގަ ވައްކަމާއި ފަސާދަ އާންމުކޮށްފައިވާ ކަމަށެވެ.
"ދޮގާއި މަކަރުން އެންމެ ފުރަތަމަ ދުރުވާންވީ ގައުމުގެ ރައީސް،" އަމީރު ވިދާޅުވި އެވެ.
ރާއްޖެ އިސްލާމްވި ދުވަހުގެ މުނާސަބަތު ފާހަގަކުރުމަށް މިއަދު ހެނދުނު ދަރުބާރުގޭގައި ބޭއްވި ރަސްމީ ޖަލްސާގައި ރައީސް މުއިއްޒު ވިދާޅުވީ ދޮގު ފަތުރާ ބަޔަކު އެކަން ކުރަނީ ލާރިކޮޅެއްގެ ބޭނުމުގައި ދުނިޔަވީ މަންފާއަކަށްޓަކައި ކަމަށެވެ.
"ދޮގާއި އާޑަފުރައްސާރަ އާއި ނެތި ނުބައި ކިޔުމުގެ ބާޒާރުގައި އެތައް ބަޔަކު އަވަދިނެތި އެބަ އުޅޭ. ލިބޭ ވަގުތީ، ދުނިޔެވީ މަންފާއަށްޓަކައި. ކުޑަ ލާރިކޮޅަކަށް،" ރައީސް ވިދާޅުވި އެވެ.
ރައީސް ވަނީ ދޮގު ހަބަރު ފަތުރަން ތިމާގެ ތަނަވަސްކަމުން ހޭދަނުކުރުމަށްވެސް އިލްތިމާސް ކުރައްވާފަ އެވެ. ދޮގު ހަބަރު ފެތުރުމަކީ ދީނުގައި އޮތް ކަމެއް ނޫން ކަމަށާއި އަދި ދޮގު ހަބަރު ފެތުރުމަކީ އެތައް ބަޔަކަށް އިންތިހާއަށް ގެއްލުން ލިބޭ ކަމަކަށްވާތީ އެއީ އެއްގޮތަކަށްވެސް އިސްލާމް ދީނުގައި ހިތްވަރު ދޭ ކަމެއް ނޫން ކަމަށްވެސް ވިދާޅުވި އެވެ.