އިނގިރޭސި ޕްރިމިއާ ލީގުގައި މިރޭ ކްރިސްޓަލް ޕެލެސް 1-0 އިން ބަލިކޮށް ލީގުގެ އެއްވަނައިގައި ލިވަޕޫލުން ހަތަރު ޕޮއިންޓްގެ ލީޑެއް ނަގައިފި އެވެ.
މި މޮޅާއެކު ލީގުގެ އެއްވަނައިގައި ލިވަޕޫލް މިހާރު އޮތީ ހަތް މެޗުން ލިބުނު 18 ޕޮއިންޓާ އެކު އެވެ. ދެވަނައިގައި ލިވަޕޫލަށް ވުރެ އެއް މެޗު މަދުން ކުޅެ 14 ޕޮއިންޓާ އެކު އޮތީ މެންޗެސްޓާ ސިޓީ އެވެ. ސިޓީން މިރޭ އަމިއްލަ ދަނޑުގައި ފުލަމްއާ ދެކޮޅަށް ނިކުންނާނެ އެވެ.
މި މެޗުން ޕެލެސް ބަލިވިއިރު އެޓީމަށް މި ސީޒަނުގެ ޕްރިމިއާ ލީގުގައި އަދި މޮޅެއް ހޯދިފައެއް ނުވެ އެވެ. އެގޮތުން ޕެލެސް އިން ކުޅުނު ހަތް މެޗުގެ ތެރެއިން ހަތަރު މެޗުން އެޓީމު ބަލިވެފައިވާއިރު ތިން މެޗު ނިމުނީ އެއްވަރުވެގެންނެވެ.
ޕެލެސްގެ ދަނޑުގައި ކުޅުނު މި މެޗުގެ 9 ވަނަ މިނެޓްގައި ޑިއޯގޯ ޖޯޓާ ވަނީ ލިވަޕޫލަށް ލީޑު ނަގައިދީފަ އެވެ. މިއީ ކޯޑީ ގަކްޕޯ ޕެލެސްގެ އޭރިއާ ތެރެއަށް ހުރަސްކޮށްލި ބޯޅައެއް އެއް ފަހަރުން ފޮނުވާލައިގެން ޖޯޓާ ކާމިޔާބު ކުރި ގޯލެކެވެ.
ދެވަނަ ހާފުގައި ގޯލެއް ފެނިގެން ގޮސްފައި ނުވާއިރު، މި ހާފުގައި ޕެލެސް އިން ވަނީ ލިވަޕޫލްގެ ގޯލަށް ނުރައްކާތެރި ހަމަލާތަކެއް ފޮނުވާލާފަ އެވެ. އެގޮތުން އެޑީ އެންކެޓިއާ އާއި އެޒޭ ފޮނުވާލި ހަމަލާތައް ދިފާއުކުރީ ލިވަޕޫލްގެ ކީޕަރު އެލިސަން އެވެ. މެޗުގެ ފަހު 10 މިނެޓްތެރޭ އެލިސަން އަށް އަނިޔާވެގެން ފޭބި ނަމަވެސް އޭގެ ފައިދާ ޕެލެސް އަށް ހިފިފައެއް ނުވެ އެވެ.
ލީގުގައި ލިވަޕޫލް ދެން ބައްދަލުކުރާނީ ޗެލްސީއާ އެވެ. ޕެލެސް ނިކުންނާނީ ނޮޓިންހަމް ފޮރެސްޓާއި ދެކޮޅަށެވެ.