ސަރުކާރުގެ ވައުދާ އެއްގޮތަށް ޗާގޯސް މައްސަލާގައި އަމަލުކުރަމުން ނުދާތީ ދަ ޑިމޮކްރެޓްސްއިން ކަންބޮޑުވުން ފާޅުކޮށްފި އެވެ.
އެ ޕާޓީން މިރޭ ނެރުނު ބަޔާނެއްގައި ބުނީ ޗާގޯސްގެ ރަށްތަކުގެ ސިޔާދަތާ ގުޅޭގޮތުން ރާއްޖެއިން ޒަމާނުއްސުރެ ގެންގުޅެމުންދިޔަ ސިޔާސަތު ބަދަލު ކުރީ ނިމިދިޔަ ސަރުކާރުން ކަމަށާއި އޭގެ ސަބަބުން ރާއްޖެއަށާއި ދިވެހިންނަށް ލިބުނު ގެއްލުމާ މެދު ރައީސް ޑރ. މުހައްމަދު މުއިއްޒުގެ ސަރުކާރުން ވެސް މިހާތަނަށް ފިޔަވަޅު އަޅާފައި ނުވާތީ އިންތިހާއަށް ކަންބޮޑުވާ ކަމަށެވެ.
"ޗާގޯސް ރަށްތަކުގެ ސިޔާދަތާ ގުޅޭގޮތުން އުފެދިފައިވާ ދެބަސްވުމުގައި، ޗާގޯސްގެ މައްޗަށް މޮރިޝަސްގެ ސިޔާދަތީ ބާރު ގަބޫލު ކުރައްވައި، ދިވެހިރާއްޖޭގެ ފަރާތުން ދައުވާ ކުރުމުގެ ހައްގު ނިމިދިޔަ ސަރުކާރުން ސިއްރު ސިޓީއަކުން ދޫކޮށްލައްވައި އަދި އދ. ގައި އެގޮތަށް ވޯޓު ދެއްވުމަކީ ދަ ޑިމޮކްރެޓްސްއިން މީގެ ކުރިން ވެސް ކަންބޮޑުވުން ފާޅުކޮށް، ކުށްވެރި ކުރި ކަމެއް،" އެ ޕާޓީން ނެރުނު ބަޔާނުގައި ބުންޏެވެ.
ޑިމޮކްރެޓްސްއިން ބުނީ ރައީސް މުއިއްޒުގެ ސަރުކާރުން ރާއްޖޭގެ އެ ނިންމުން އަލުން މުރާޖާ ކުރާނެ ބުނެފައިވާއިރު ޗާގޯސް ރަށްތަކުގެ ސިޔާދަތުގެ މައްޗަށް ދައުވާ ކުރުމުގެ ހައްގު އަލުން ހޯދުމަކީ އެމަނިކުފާނގެ ރިޔާސީ ވައުދެއް ކަމަށެވެ. ނަމަވެސް މި ސަރުކާރުން އެކަމާ މެދު އެއްވެސް ފިޔަވަޅެއް ނާޅަނީސް އިނގިރޭސިވިލާތުގެ ސަރުކާރުން ޗާގޯސް، މޮރިޝަސްއާ ހަވާލު ކުރަން ނިންމާފައިވާކަން ޑިމޮކްރެޓްސްއިން ފާހަގަ ކުރި އެވެ.
ޑިމޮކްރެޓްސްއިން ވަނީ އެކަމަށް ދައުވާ ކުރުމުގެ ހައްގު ރާއްޖެއިން ދޫކޮށްލުމުގެ ސަބަބުން ނުވަތަ އެ ހައްގު އަލުން ހޯދައި ދިނުމަށް މަސައްކަތް ނުކުރުމުގެ ކުރުމުގެ ސަބަބުން ރާއްޖޭގެ ސިޔާދަތައް ގެއްލުން ލިބިފައިވާ ކަމަށްވެސް ބުނެފަ އެވެ.