ވެރިކަން ކުރާ ޕީއެންސީގެ މެމްބަރުންގެ އަދަދު 60،000 އިން މައްޗަށް އަރާފައިވާ ކަމަށް، ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުލްރަހީމް އަބްދުﷲ ވިދާޅުވެއްޖެ އެވެ.
ޕީއެންސީ އަށް މެމްބަރުން އިތުރުކުރަން ހުޅުމާލޭގައި އިއްޔެ ކުރިއަށް ގެންދިޔަ އިވެންޓަށްފަހު މީޑިއާތަކާ ވާހަކަދައްކަވަމުން އަބްދުލްރަހީމް ވިދާޅުވީ ޕީއެންސީއަށް މެމްބަރުން އިތުރުކުރުމަށް މިހާރު ކުރަމުންދާ މަސައްކަތުގެ ދަށުން މިހާތަނަށް އެ ޕާޓީގެ މެމްބަރުންގެ އަދަދު 60،000 އިން މައްޗަށް އަރާފައިވާ ކަމަށެވެ. އަދި އަންނަ މަހުގެ 17 ގެ ނިޔަލަށް 75،000 މެމްބަރުންނާއެކު ޕީއެންސީ އަކީ ރާއްޖޭގެ އެންމެ ބޮޑު ޕާޓީއަށް ހެދުމަށް ރައީސް ޑރ. މުހައްމަދު މުއިއްޒު ބޭނުންފުޅުވާ ކަމަށާއި އެ އަމާޒަށް ވާސިލުވެވޭނެ ކަމާމެދު ޝައްކެއް ނެތް ކަމަށް ވިދާޅުވި އެވެ.
"މިއަދު ފެނިގެން މިދަނީ ރައީސް ޑރ. މުހައްމަދު މުއިއްޒުގެ ސިޔާސަތަށް ރައްޔިތުން ތާއީދުކުރާ މިންވަރު. އެހެންވީމަ މިހާ ބާރު ސްފީޑެއްގައި އަޅުގަނޑުމެންގެ މެމްބާޝިޕް އިތުރުވެގެން މިދަނީ،" އަބްދުލްރަހީމް ވިދާޅުވި އެވެ.
ރާއްޖޭގައި މިހާތަނަށް އުފެދުނު އެއްވެސް ސިޔާސީ ޕާޓީއަކަށް މިހާ ކުރު މުއްދަތެއްގެ ތެރޭގައި މިހާ ގިނަ މެމްބަރުން ވަދެފައި ނުވާ ކަމަށާއި މި ކާމިޔާބީގެ ސިއްރަކީ ރައީސް މުއިއްޒު ގައުމާއި ދޭތެރޭ ގެންގުޅުއްވާ ތަސައްވުރާއި ރައްޔިތުންނާއި ގާތުން ކުރާ މަސައްކަތް ކަމަށް އަބްދުލްރަހީމް ވިދާޅުވި އެވެ. އަދި ޕީއެންސީ އަށް މެމްބަރުން އިތުރުކުރަން ހުރިހާ ފަރާތްތަކަކުން ވެސް މަސައްކަތް ކުރަނީ އަމިއްލަ ކަމެއްގެ ގޮތުގައި ދެކިގެން ކަމަށްވެސް ވިދާޅުވި އެވެ.
އިލެކްޝަންސް ކޮމިޝަންގެ ސިޔާސީ ޕާޓީތަކުގެ ދަފްތަރުގައިވާ ގޮތުން މިދިޔަ މަހުގެ 19 ގެ ނިޔަލަށް ޕީއެންސީގައި ތިބީ 28،983 މެންބަރުންނެވެ. ޕީއެންސީއާ ގުޅިގެން މަސައްކަތް ކުރަމުންދާ ޕީޕީއެމްގެ މެންބަރުންގެ އަދަދު އުޅެނީ 34،698 ގަ އެވެ.
ރާއްޖޭގައި މިވަގުތު އެންމެ މެމްބަރުން ގިނަ ޕާޓީގެ ގޮތުގައި އޮތީ އެމްޑީޕީ އެވެ. އީސީގެ ދަފްތަރުގައިވާ ގޮތުން އެމްޑީޕީގައި މިވަގުތު 50،851 މެންބަރުން އެބަ ތިއްބެވެ.