ސްޕެނިޝް ލީގުގައި ރޭ ރެެއާލް މެޑްރިޑުން 2-0 އިން ވިޔަރެއާލް ބަލިކޮށްފި އެވެ.
މި މޮޅާއެކު 9 މެޗުން ލިބުނު 21 ޕޮއިންޓާ އެކު ރެއާލް އޮތީ ލީގުގެ ދެވަނައިގަ އެވެ. އެއްވަނައިގައި ރެއާލަށް ވުރެ އެއް މެޗު މަދުން ކުޅެގެން އޮތް ބާސެލޯނާ އަށް ވެސް ހަމަ އެ އަދަދަށް ޕޮއިންޓް ލިބިފައިވާއިރު، ބާސާ އިން މިރޭ އަލަވޭސްއާ ދެކޮޅަށް ނިކުންނާނެ އެވެ.
ރޭގެ މެޗާއެކު ރެއާލުން ލީގުގައި ބަލިނުވެ މި ވަނީ 41 މެޗު ހަމަކޮށްފަ އެވެ. އެންމެ ފަހުން ރެއާލް ލީގުގައި ބަލިވީ، 2023 ވަނަ އަހަރު ސެޕްޓެމްބަރު މަހު، އެތުލެޓިކޯ އަތުންނެވެ.
އަމިއްލަ ދަނޑުގައި ކުޅުނު މި މެޗުގެ 14 ވަނަ މިނެޓްގައި ރެއާލުން ވަނީ ލީޑު ނަގާފަ އެވެ. މިއީ އޭރިއާގެ ބޭރުގައި ހުރެ ފެޑެރީކޯ ވަލްވާޑޭ ފޮނުވާލި ހަމަލާއަކުން ކާމިޔާބު ކުރި ގޯލެކެވެ. އޭގެ އިރުކޮޅެއްފަހުން ވިޔަރެއާލްގެ ނިކޮލަސް ޕެޕޭ ބޮލުން ފޮނުވާލި ހަމަލާއެއް ވަނީ ގޯލުގެ ދަނޑި އަށް އަމާޒުވެފަ އެވެ.
މި މެޗުން ރެއާލަށް ތިން ޕޮއިންޓު ކަށަވަރުކޮށްދިން ގޯލު މެޗުގެ 73 ވަނަ މިނެޓްގައި ކާމިޔާބުކޮށްދިނީ ވިނީޝަސް ޖޫނިއާ އެވެ. މިއީ ވެސް އޭރިއާގެ ބޭރުގައި ހުރެ ފޮނުވާލި ބާރު ހަމަލާއަކުން ކާމިޔާބު ކުރި ގޯލެކެވެ.
ސްޕެނިޝް ލީގުގައި ރެއާލުން ދެން ބައްދަލުކުރާނީ ސެލްޓަ ވީގޯއާ އެވެ.