އައްޑޫގައި މިހާރު ބިނާކުރަމުން އަންނަ އިސްލާމީ މަރުކަޒު ވާނީ އިސްލާމިކް މިނިސްޓްރީގެ ދެކުނުގެ ގޮތްޕަށް ކަމަށް މިނިސްޓަރު ޑރ. މުހަމައްދު ޝަހީމް އަލީ ސައީދު ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި މިނިސްޓަރު ވިދާޅުވީ ހިތަދޫގައި އިމާރާތް ކުރަމުން އަންނަ އިސްލާމީ މަރުކަޒުގެ މަސައްކަތް ވަރަށް ބާރަށް ކުރިއަށްދާ ކަމަށާއި އަމާޒަކީ އަންނަ އަހަރުގެ ޖޫން އަށް އެތަން ނިންމުން ކަމަށެވެ.
"މިތަން ވެގެންދާނީ ދެކުނުގައި ހުންނަ އިސްލާމިކް މިނިސްޓްރީގެ ގޮތްޕަކަށް. އިންޝާ ﷲ. ލައިބްރަރީގެ ތަމްރީނު ފެސިލިޓީ އާއި އިދާރާ ހިމެނޭނެ. މިސްކިތް ބައިގައި އިލްމުވެރި އިމާމަކާއި ބަންގިގޮވާ މުއައްޒިނަކު ހުންނާނެ.: ޝަހީމު ވިދާޅުވި އެވެ.
އައްޑޫ އިސްލާމީ މަރުކަޒުގެ ކޮންޓްރެކްޓަރަކީ ފެޑޯ ޕްރައިވެޓް ލިމިޓެވެ. އެ ކުންފުންޏާ އެ މަޝްރޫއު ހަވާލުކުރީ މިދިޔަ އަހަރުގެ މާޗް 24 ގަ އެވެ. އަދި އިސްލާމީ މަރުކަޒުގެ ބިންގާ އެޅީ މިދިޔަ އަހަރުގެ ޖުލައި 26 ގަ އެވެ. މިއީ 55.52 މިލިއަންގެ މަޝްރޫޢުއެކެވެ.
ދެ ފަންގިފިލާ ހިމެނޭ އިސްލާމީ މަރުކަޒު އިމާރާތުގައި 1،500 މީހުންގެ ޖާގައިގެ ނަމާދުކުރާ ބަޔަކާއި 450 މީހުންގެ ޖާގައިގެ މަލްޓި ޕާޕަސް ހޯލަކާއި ހަތަރު ކްލާސްރޫމާއި ދެ ސެމިނަ ރޫމްގެ އިތުރުން އިދާރީ އޮފީހާއި އިސްލާމިކް ލައިބްރަރީ އަދި ޕޭންޓްރީ ހިމެނޭނެ އެވެ.
އައްޑޫ އިސްލާމީ މަރުކަޒު ބިނާކުރަނީ ކުރިން ހިތަދޫގައި ޕޮލިސް ޓްރެއިނިން ސްކޫލް ހުރި ބިމުގަ އެވެ.