މި ސަރުކާރުގެ ފަސް އަހަރުގެ ތެރޭގައި ޓޫރިޒަމް ދާއިރާގެ އާމްދަނީ 7 ބިލިއަން ޑޮލަރަށް އެރުވުމަކީ އަމާޒެއް ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްގައި މިނިސްޓަރު ވިދާޅުވީ ޓޫރިޒަމް ދާއިރާގެ މިހާރުގެ އާމްދަނޫ ހުރީ 4.5 ބިލިއަން ޑޮލަރުގައި ކަމަށެވެ.
ފައިސަލް ވިދާޅުވީ މި ފަސް އަހަރު ނިމޭއިރު އާމްދަނީ 7 ބިލިޔަން ޑޮލަރަށް އިތުރުކުރުމަށް ޕްލޭންތަކެއް އެބަހުރި ކަމަށާއި އަހަރެއްގެ މައްޗަށް ރާއްޖެއަށް އަންނަ ޓޫރިސްޓުންގެ އަދަދު ވެސް 4 މިލިއަންނަށް އިތުރު ކުރުމަށް އަމާޒު ހިފައި ގިނަ މަސައްކަތް ކުރަމުން އަންނަ ކަމަށެވެ.
"އަޅުގަނޑަށް ގަބޫލުކުރެވެނީ ކުރިއަށް މިއޮތް އަހަރުތަކުގައި ރާއްޖޭގެ ފަތުރުވެރިކަން ވަރަށް ބޮޑުތަނުން ހަމަ ކުރިއަރައިގެން ގޮސް މިހާރު ފަތުރުވެރިކަމުގެ ސިނާއަތުން ރާއްޖެގެ އިޤްތިޞާދަށް މި ކޮންޓްރިބިއުޓްކުރާ 4.5 ބިލިޔަން ޑޮލަރު ގާތްގަނޑަކަށް 7 ބިލިޔަން ޑޮލަރަށް މި ސަރުކާރު ނިމިގެންދާއިރު އަޅުގަނޑުމެންނަށް ޖެއްސޭނެ ކަމަށް،" މިނިސްޓަރު ވިދާޚުވި އެވެ. "އެއަށް އަމާޒުކުރަމުން މިދަނީ. މި ސަރުކާރުގެ 5 އަހަރު ނިންމާލާނީ 3.5 މިލިޔަން ނުވަތަ 4 މިލިޔަން ފަތުރުވެރިން ގެނެސްފައި. އެކަން ކުރެވޭނެ އަޅުގަނޑުމެންނަށް މިހާރު މިހުރި ޕްލޭންތަކަށް މަސައްކަތްކޮށްފި ކަމަށް ވަންޏާ."
ފައިސަލް ވިދާޅުވީ ރާއްޖެ އަށް މިހާރު އެންމެ ގިނަ ޓޫރިސްޓުން އަންނަ ޗައިނާގެ އިތުރުން ރާއްޖެ އަށް މިދިޔަ އަހަރު އެންމެ ގިނަ ޓޫރިސްޓުން އައި އިންޑި އާއިން ރާއްޖެއަށް އަންނަ ޓޫރިސްޓުންގެ އަދަދު އިތުރުކުރުމަށް ވެސް ގިނަ މަސައްކަތްތަކެއް ކުރެވެމުން އަންނަ ކަމަށެވެ.
މިނިސްޓަރު ވިދާޅުވީ އަހަރު ފެށުނު އިރު އިންޑިއާ މާކެޓަށް ހީނަރުކަން އައި ނަމަވެސް މިހާރު މި މާކެޓް ވެސް މަޑުމަޑުން ރަނގަޅުވަމުން އަންނަ ކަމަށެވެ. އިންޑިއާ މިހާރު އޮތީ ރާއްޖެ އެންމެ ގިނަ ޓޫރިސްޓުން އަންނަ 10 ގައުމުގެ ލިސްޓްގެ ހަ ވަނައިގަ އެވެ.
ފައިސަލް ވިދާޅުވީ ކުރިއަށް އޮތް ޕީކް ސީޒަން ނިމޭ އިރު، އިންޑިއާ މާކެޓް ވަރަށް ބޮޑު ކުރިއެރުމެއް ހޯދާނެ ކަމަށް ގަބޫލު ކުރެވޭ ކަމަށެވެ.