އެފްއޭއެމްގެ ފައިސާ ނަހަމަ ގޮތުގައި ބޭނުންކޮށް، އެތަނުގެ ފައިސާ އިން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް ބައްލަވައިގެންފައިވާ ދެ އެޕާޓްމަންޓް ފުލުހުންނަށް ހަވާލުކުރަން އެދުމުން އެ ތަންތަން ހުސްކުުރަން އިތުރު ވަގުތަށް އޭނަ އެދިވަޑައިގެންފި އެވެ.
އެފްއޭއެމަށް ފީފާ އިން ދިން ފައިސާ އަށް ބައްސާމް އެޕާޓްމަންޓްތަކެއް ބައްލަވައިގަތް މައްސަލައިގައި އޭނަގެ މައްޗަށް ދައުވާކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވާފައިވާ އިރު އެ ދެ އެޕާޓްމަންޓް މިއަދުގެ ކުރިން ފުލުހުންނާ ހަވާލުކުރަން ވެސް އޮތީ އަންގައިފަ އެވެ.
ނަމަވެސް ފުލުހުން މިއަދު މީޑިއާތަކަށް ބުނީ އެޕާޓްމަންޓްތައް ހަވާލުކުރުން މި މަހުގެ 31 ގެ ނިޔަލަށް ފަސްކޮށް ދިނުމަށް އެދި ބައްސާމްގެ ވަކީލުން ސިޓީއެއް ފޮނުވާފައިވާ ކަމަށެވެ. އަދި އެ ސިޓީއަށް ޖަވާބު ދިނުމަށް މަސައްކަތް ކުރަމުން އަންނަ ކަމަށް ވެސް ފުލުހުން ބުންޏެވެ.
ފުލުހުން ކުރިން ބުނެފައި ވަނީ މިއަދުގެ ކުރިން އެޕާޓްމަންޓްތައް ހަވާލުނުކޮށް ފިނަމަ ފުލުހުންގެ ބެލުމުގެ ދަށަށް އެ ތަންތަން ނަގާނެ ކަމަށެވެ.
އަމީން އެވެނިއު އިން ބައްސާމް ދެ ފުލެޓް ބައްލަވައިގަތީ އެފްއޭއެމްގެ ގަތީ އެފްއޭއެމްގެ 3،084،000ރ. ބޭނުންކޮށްގެން ކަމަށް ފުލުހުން ބުނެފައިވެ އެވެ. އެ ގޮތުން، އެފްއޭއެމުން އަމީން އެވެނިއުއަށް އޭޕްރީލް 14، 2021 ގައި އެއް މިލިއަން ޑޮލަރު ޖަމާކުރި ކަމަށް ބުނެފައިވެ އެވެެ.
އެ ފައިސާއަކީ ކޮވިޑް ވަބާގެ ތެރޭގައި ކުލަބުތަކަށް ފައިސާ ދޫކުރަން ފީފާއިން އެފްއޭއެމަށް ދިން 1.9 މިލިއަން ޑޮލަރުގެ ތެރެއިން ބައެއް ކަމަށް ފުލުހުން ވެސް ބުނެފައިވެ އެވެ.