ބޮލީވުޑްގެ ޒުވާން ބަތަލާ އަނަންޔާ ޕާންޑޭގެ އާ ފިލްމު "ކޮންޓްރޯލް" ބެލުންތެރިންނާއި ކްރިޓިކުންނަށް ވެސް ވަރަށް ކަމުގޮސްފި އެވެ.
"އުޅާން" އާއި "ލުޓޭރާ" އަދި "އޭކޭ ވާސަސް އޭކޭ" ފަދަ މަގުބޫލުތައް ފިލްމުތައް ގެނެސްދިން ކުޅަދާނަ ޑައިރެކްޓަރު އަދިތިޔަ މޮޓްވާނާ ޑައިރެކްޓްކޮށްފައިވާ "ކޮންޓްރޯލް" އަކީ ޓެކްނޮލޮޖީ އާއި މި ޒަމާނުގެ ސޯޝަލް މީޑިއާގެ ނުފޫޒު ސަބަބުން ކުރިމަތިވާ ކަންތައްގަނޑެއް ދައްކުވައިދޭ ސްކްރީންލައިފް ތުރިލާއެކެވެ.
މީގައި އަނަންޔާ ކުޅެފައި ވަނީ އޭނަ އަށް ބޭވަފާތެރިވާ ލޯބިވެރިއެއްގެ ހަނދާންތައް ދުއްވައިލަން މަސައްކަތްކުރާ ސޯޝަލް މީޑިއާ އިންފުލުއެންސާއެއްގެ ރޯލެވެ. އެކްޓަރު ޗަންކީ ޕާންޑޭގެ ދަރިފުޅު މިހާތަނަށް ކުޅުނު ގިނަ ފިލްމުތަކުގައި ދެއްކި އެކްޓިންތަކަށް ގިނަ ބަޔަކު މަލާމާތްކޮށް، ޖޯކް ޖެހި ނަމަވެސް "ކޮންޓްރޯލް" ގައި އަނަންޔާގެ އެކްޓިން ވަރަށް މޮޅު ކަމަށާއި ކެރެކްޓާ އަށް ވަރަށް ފުރިހަމަ އަށް ޒުވާން ބަތަލާ އިންސާފުކޮށް ދީފައިވާ ކަމަށް ބުނެ ސޯޝަލް މީޑިއާގައި އެކި މީހުން އަންނަނީ އެ ވާހަކަ ހިއްސާ ކުރަމުންނެވެ.
މިދިޔަ ހުކުރު ދުވަހު ނެޓްފްލިކްސް އިން ޕްރީމިއާކުރި ފިލްމަށް ކްރިޓިކުން ވެސް ވަރަށް ބޮޑަށް ތައުރީފުކޮށްފައިވެ އެވެ، އެގޮތުން މިއީ މިއަދުގެ ދުނިޔޭގައި އެތައް ބަޔަކު ކުރިމަތިލާން ޖެހިފައިވާ ކަންތައްތަކެއް ދައްކުވައިދޭ، ވަރަށް ޝައުގުވެރި އަދި ފުރިހަމަ ފިލްމެއް ކަމަށް ބުނެފައިވެ އެވެ.
ގިނަ ކްރިޓިކުން ފާހަގަކޮށްފައިވާ ގޮތުގައި "ކޮންޓްރޯލް" ކަމުދިޔަ އެންމެ މުހިއްމު މީގެ ސްކްރީންޕްލޭ މޮޅުވެފައި، ފިލްމުގެ ޑައިރެކްޝަން ވަރަށް ރީއްޗަށް ގެނެސްދީފައި އޮތުމެވެ. އެހެންވެ ކްރިޓިކުން ބުނެފައި ވަނީ މިއީ ނުބަލައި ދޫކޮށްލާ ވަރުގެ ފިލްމެއް ނޫން ކަމަށެވެ.