ކުރިއަށް އޮތް ފަސް ދުވަހު ރާއްޖެއަށް މޫސުން ގޯސްވާނެ ކަމަށް ލަފާކުރެވޭ ކަމަށް މެޓް އޮފީހުން ބުނެފި އެވެ.
މެޓް އޮފީހުން މިއަދު ބުނީ ކުރިއަށް އޮތް ފަސް ދުވަހު އުތުރަށާއި މެދުރާއްޖެތެރޭގެ ސަރަހައްދުގައި އާންމުވައި ހުންނާނީ ގާތްގަނޑަކަށް ގަޑިއަކު 15 މޭލާއި 25 މޭލު ބާރުމިނުގައި ކަމަށެވެ.
ދެކުނުގެ ސަރަހައްދުގައި 13 މޭލާއި 23 މޭލަށް ވައިޖެހި، ވިލާގަނޑުގައި ގާތްގަނޑަކަށް 45 މޭލާއި 55 މޭލަށް ވައިގަދަވުން އެކަށީގެންވާ ކަމަށް މެޓުން ބުންޏެވެ. އަދި ގަދަ ވަޔާއެކު ބޯކޮށް ވާރޭވެހި، ގުގުރާނެ ކަމަށާއި ދިޔަވަރު ބޮޑުވާ ގަޑިތަކުގައި އުދައިގެ އަސަރު ވެސް ކޮށްފާނެ ކަމަށް ވެސް ބުންޏެވެ.
މެޓް އޮފީހުން ވަނީ ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހޭނެ ކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސްކޮށްފަ އެވެ. އަދި ކަނޑުދަތުރު ކުރާ ފަރާތްތަކުން ދަތުރަކަށް ފެށުމުގެ ކުރިން ފަހުގެ މޫސުމީ މައުލޫމާތު ހޯދުމަށް ވެސް ވަނީ އިލްތިމާސްކޮށްފަ އެވެ.