މޯލްޑިވިއަން އިން ކުރި ދަތުރުތަކަށް އެމްޑީޕީން ދައްކަންޖެހޭ 5.6 މިލިއަންގެ ތެރެއިން އެއް މިލިއަން ދެއްކުމުން އައިލެންޑް އޭވިއޭޝަނުން ދައުވާ އަބުރާ ގެންގޮސްފި އެވެ.
އެމްޑީޕީން މޯލްޑިވިއަން ހިންގާ އައިލެންޑް އޭވިއޭޝަނަށް ނުދައްކާ އޮތް 5.6 މިލިއަން ރުފިޔާ ހޯދަން މޯލްޑިވިއަނުން ވަނީ މިދިޔަ އަހަރު ސިވިލް ކޯޓަށް މައްސަލައެއް ވައްދާފަ އެވެ.
ސިވިލް ކޯޓުން އިއްޔެ ކުރި ހުކުމުގައިވާ ގޮތުން މި މައްސަލައިގައި ދެ ފަރާތުން މަޝްވަރާކުރުމަށްފަހު އެ ފައިސާ ދެއްކުމާ ބެހޭގޮތުން އެއްބަސްވުމެއް ވަނީ ހަދާފަ އެވެ.
އެއްބަސްވުމުގައި ބުނާގޮތުން އެއްބަސްވުމުގައި ސޮއިކުރާ ދުވަހު ފުރަތަމަ އިންސްޓޯލްމަންޓްގެ ދަށުން އެއް މިލިއަން ރުފިޔާ ދައްކަން ޖެހެ އެވެ. އެ ފައިސާ އެމްޑީޕީން ދައްކާފައިވާއިރު މި މައްސަލައިގެ ދައުވާ ފޯމު ބާތިލުކޮށްފައިވަނީ ސެޓްލްމެންޓް އެއްބަސްވުމާ އެއްގޮތަށް ފައިސާ ނުދައްކާނަމަ ނުވަތަ އެއާ ހިލާފުވެއްޖެ ނަމަ، އަލުން މި މައްސަލަ ހުށަހެޅުމުގެ ފުރުސަތު މޯލްޑިވިއަނަށް ލިބޭ ގޮތަށެވެ.