އާފުރުމަކީ ޠަބީޢީ ގޮތުން މެދުވެރިވާ ކަމެކެވެ. އެކަމަކީ ﷲ ތަޢާލާ ނުރުހުންތެރިވެ ވޮޑިގަންނަވާ ކަމެކެވެ. ސަބަބަކީ އެއީ ޝައިތާނާ އެކަމުގެ ތެރެއަށް ބާރު ފޯރުވާ ކަމަކަށްވާތީ އެވެ. އަދި އެއީ ޝައިތާނާ އިންސާނާގެ ހަށިގަނޑަށް ވަދެ ގަންނަން ލިބޭ ފުރުސަތަކަށްވާތީ އެވެ. އަދި އެއީ އިންސާނާގެ ހަށިގަނޑަށް އިތުރު ލޮޑުކަމާއި ވަރުބަލިކަމާއި ކަންނެތްކަން ގެނުވާނެ ކަމަށްވާތީއެވެ. އަދި ހަމައެއާއެކީ އާފުރޭ ވަގުތަކީ ޝައިތާނާ އުފާކޮށް ހޭނެ ވަގުތަކަށްވާތީ އެވެ.
ސަބަބަކީ އަނގަހުޅުވައި އަޑުލައްވަމުން އާފުރޭ ހިނދު، ﷲ ތަޢާލާ އެންމެ ރިވެތި ސޫރައިގައި ޚަލްޤުކުރެއްވި އިންސާނާގެ މޫނުގެ ރީތި ސިފަ ހުތުރުވެފައިވާނެތީ އެވެ.
* އާފުރޭ ހިނދު އެކަން ކުޅަދާނަވީ ވަރަކުން ކޮންޓްރޯލް ކުރަން މަސައްކަތް ކުރަން ވާނެ އެވެ.
* އާފުރޭހިނދު އަނގަމަތީ އަތް އަޅައި، ދަތްޕިލަ ޖައްސައި، އަނގަ ލައްޕަން ވާނެ އެވެ.
* އަނގަމަތީ އަތް އެޅުމުގައި އައުލާކަން ބޮޑީ ވާތްތިލައިގެ ބޭރުފުށް އަނގަމަތީގައި އެޅުމެވެ. ސަބަބަކީ އާފުރުމަކީ ﷲ ތަޢާލާ ނުރުހުންތެރިވެ ވޮޑިގަންނަވާ ކަމަކަށްވެފައި، އެކަން ކޮންޓްރޯލް ކުރުމަށް ބޭނުން ކުރުން އައުލާކަން ބޮޑީ ވާތްތިލަ ކަމަށްވާތީ އެވެ
* އާފުރޭ ހިނދު "ހާ" ފަދަ އަޑެއް ލައްވައިގެން ނުވާ ނެއެވެ.
އާފުރުމަކީ ޝައިތާނާ އިންސާނާގެ ހަށިގަނޑަށް ވަދެގަންނަން ލިބޭ ފުރުސަތެއް ކަމުގައިވިޔަސް، އާފުރޭ ހިނދު "އަޢޫޛު" ކިޔުމަށް ނަބިއްޔާ ﷺ އިރުޝާދު ދެއްވާފައެއް ނުވެ އެވެ. އެހެންކަމުން އާފުރޭ ހިނދު "އަޢޫޛު" ކިޔުމަކީ ޘާބިތުވެގެންވާ ކަމެއް ނޫނެވެ.
ނޯޓް: މިއީ ޝެއިހް އަހުމަދު ރިމާޒުގެ ލިޔުއްވުމެކެވެ.