ރައީސް ޑރ. މުހައްމަދު މުއިއްޒަށް ދެވަނަ ދައުރެއް ދޭންޖެހޭ ކުޑަވެސް ސަބަބެއް ފެންނަން ނެތް ކަމަށް ސަރުކާރު ކޯލިޝަންގައި ހިމެނޭ މޯލްޑިވްސް ޑިވަލޮޕްމަންޓް އެލަޔަންސް (އެމްޑީއޭ)ގެ ނައިބު ލީޑަރު އަދި ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް "އެކްސް"ގައި ކުރެއްވި ޕޯސްޓެއްގައި ވިދާޅުވީ ރައީސް މުއިއްޒަށް ދެވަނަ ދައުރެއް ދޭންޖެހޭ ކުޑަވެސް ސަބަބެއް އަދި ފެންނަން ނެތް ކަމަށާއި 25 ރަށަށް ދެވުނުއިރު މި ސަރުކާރު ރަނގަޅޭ ބުނި އެކަކާއި ވެސް ދިމާނުވާ ކަމަށެވެ.
"މިހާ އަވަހަށް ރައްޔިތުންގެ އިތުބާރު ގެއްލުނު ވެރިކަމެއް ފާއިތުވި 17 އަހަރު ނުދެކެން. ފަށާފައި ހުއްޓިފައި ހުރި ޕްރޮޖެކްޓެއް ހުރީ ހުއްޓިފަ. އަލުން އާ ކަމެއް ނުކުރެވޭތަނުގައި ސަރުކާރު ނިސްބަތްވާ ކުންފުނިތަކުގެ މުވައްޒަފުންގެ މުސާރައާ އިނާޔަތްތައް ކުޑަކުރުމުގެ ސަބަބުން އާއިލާތައް މިވަނީ ވަރަށް ބޮޑަށް ނިކަމެތި ވެފައި،" އައްބާސް ވިދާޅުވި އެވެ.
އައްބާސް ވިދާޅުވީ އުއްމީދަކީ ކުރިއަށް އޮތް ދުވަސްތަކުގައި ކަންކަން ހަމަޔަކަށް އެޅި، ރައްޔިތުން އެދޭ ގޮތަށް ވެރިކަން ކުރެއްވުން ކަމަށެވެ. އަދި ބިނާކުރަނިވި ފާޑުކިޔުންތަކާއެކު ރައްޔިތުންގެ ހެވާއި ލާބައަށް ސަރުކާރަށް އެއްބާރުލުން ދެއްވާނެ ކަމަށްވެސް އައްބާސް ވިދާޅުވި އެވެ.
ސަރުކާރުގެ ބައެއް ސިޔާސަތުތަކާއި އަދި ޕީއެންސީ އަށް އަމާޒުކޮށް އައްބާސް މިފަހުން ގެންދަވަނީ ސޯޝަލް މީޑިއާގައި ފާޑުކިޔުންތައް އަމާޒުކުރަމުންނެވެ.