ސްޕެނިޝް ލީގުގައި ރޭ ބާސެލޯނާ އިން 3-0 އިން އަލަވޭސް ބަލިކޮށްފި އެވެ.
މި މޮޅާއެކު ލީގުގެ އެއްވަނައިގައި ބާސާ އޮތީ 9 މެޗުން ލިބުނު 24 ޕޮއިންޓާއެކު އެވެ. ދެވަނައިގައި 21 ޕޮއިންޓާ އެކު ރެއާލް މެޑްރިޑް އޮތްއިރު، ތިންވަނައިގައި 17 ޕޮއިންޓާ އެކު އޮތީ އެތްލެޓިކޯ މެޑްރިޑެވެ.
އަލަވޭސްގެ ދަނޑުގައި ކުޅުނު މި މެޗުގެ ހަތްވަނަ މިނެޓްގައި ބާސާ އިން ވަނީ ލީޑު ނަގާފަ އެވެ. އަލަވޭސްގެ އޭރިއާ ތެރެއަށް ރަފީނިއާ ހުރަސްކޮށްލި ބޯޅަ ބޮލުން ގޯލަށް ވައްދާލައިގެން ބާސާ އަށް ލީޑު ނަގައިދިނީ އެޓީމުގެ ފޯވާޑް ރޮބަޓް ލެވެންޑޯސްކީ އެވެ. އަދި މެޗުގެ 22 ވަނަ މިނެޓްގައި ރަފީނިއާ ތަނަވަސްކޮށްދިން ފުރުސަތަކުން ބާސާގެ ދެވަނަ ގޯލުވެސް ކާމިޔާބުކޮށްދިނީ ލެވެންޑޯސްކީ އެވެ.
އަދި މެޗުގެ 32 ވަނަ މިނެޓްގައި ލެވެންޑޯސްކީ ވަނީ ބާސާގެ ތިންވަނަ ގޯލު ކާމިޔާބުކޮށްދީ އޭނާގެ ހެޓްރިކް ފުރިހަމަކޮށްފަ އެވެ. މި ތިން ގޯލާއެކު މި ސީޒަނުގައި ލެވެންޑޯސްކީ ބާސާ އަށް ކާމިޔާބުކޮށްދިން ގޯލުގެ އަދަދު ވަނީ 12 އަށް އަރާފަ އެވެ.
މެޗުގެ ދެވަނަ ހާފުގައި ގޯލެއް ފެނިގެން ގޮސްފައި ނުވާއިރު، މި ހާފުގައި ބާސާ އަށް ވަނީ ލީޑު އިތުރަށް ފުޅާކޮށްލަން ވެސް ރަނގަޅު ފުރުސަތުތަކެއް ލިބި ބޭކާރުވެފަ އެވެ.
ލީގުގައި ބާސާ ދެން ބައްދަލުކުރާނީ ސެވިއްޔާއާ އެވެ.