ދިވެހިރާއްޖޭގެ ރައީސުލްޖުމްހޫރިއްޔާގެ ނައިބް ކަމުގައި ހުންނެވި ޑރ.މުހައްމަދު ޖަމީލް އަހުމަދުގެ އިތުބާރު ނެތް ކަމަށް ޕީޕީއެމްގެ އިސް ބޭފުޅުން ވިދާޅުވަމުން ގެންދަވާ ދަނޑިވަޅެއްގައި، އިއްތިފާޤަކުން ނަމަވެސް އެބޭފުޅާ އެހުންނެވީ ރައީސް އަބްދުﷲ ޔާމީންގެ ވެރިކަން ފުރޮޅާލެވޭނެ ފަދަ ހިސާބެއްގައެވެ. އިދިކޮޅު ފަރާތްތަކުން ވިދާޅުވާ ގޮތުންނަމަ އަނިޔާވެރިކަން ނިންމާލެވޭނެ ފަދަ ބާރުގަދަ މަޤާމެއްގައެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީ ބުނާގޮތުން ރައީސް ކަމުގައި ހުންނަވާ ބޭފުޅަކު ރާއްޖޭގައި ނެތް ނަމަ ރައީސް ކަމުގެ ހުރިހާ މަސްޢޫލިއްޔަތެއް ނަންގަވަން ޖެހިވަޑައިގަންނަވާނީ ނައިބު ރައީސެވެ. އެހެން ކަމުން މިރޭގެ މުޒާހަރާއަށް ފަހު މާލެ ތެރޭގެ ހާލަތު ކޮންމެ ގޮތަކަށް ބަދަލުވެގެން ދިޔައަސް އެކަމުގައި ނައިބް ރައީސް ޑރ.ޖަމީލަށް ފެނިވަޑައިގަންނަވާ ގޮތަކަށް ފިޔަވަޅު އެޅުމުގެ ފުރުސަތު އެބައޮތެވެ.
ޕީޕީއެމްގެ ބައެއް އިސްބޭފުޅުންގެ ވާހަކަތަކަށް ބަލާއިރު ނައިބް ރައީސް ޑރ.ޖަމީލްގެ 'މައްސަލަ' އަކީ އެބޭފުޅާ އިދިކޮޅު ފަރާތްތަކާއި މާ 'ގާތް' ގުޅުމެއް ބޭއްވުމުގެ އިތުރުން ސީދާ ރައީސް ޔާމީން އާއި ދެމެދުގައި އޮންނެވި 'ޓްރަސްޓް އިޝޫ' އެކެވެ. މިކަމަށް ސީދާ ރައީސް ޔާމީން ކޮމެންޓެއް ދެއްވާފައި ނުވި ނަމަވެސް މިހާރު މަޖިލީހަށް ހުށަހެޅިފައިވާ ނައިބް ރައީސް ކަމަށް ކުރިމަތިލާ މީހެއްގެ އުމުރު ދަށް ކުރާ އިސްލާޙަކީ ސީދާ ނައިބް ރައީސް ދުއްވާލުމަށް ކުރާ މަސައްކަތެއް ގޮތުގައި ސިޔާސީ ބައެއް ފަރާތްތަކުން ވަނީ ތުހުމަތުކޮށްފައެވެ.
އިދިކޮޅު ފަރާތްތަކުން ކުރާ މުޒާހަރާގެ އަޑު ސަރުކާރަށް އިވިއްޖެ ކަމަށް ވިދާޅުވެ ހުރިހާ ސިޔާސީ ކުށްވެރިން ދޫކޮށްލެވިދާނެއެވެ. އަދި އޭގެ އިތުރުން ދިވެހިރާއްޖޭގެ ހުރިހާ ސިޔާސީ ޕާޓީތަކުގެ އިސްވެރިންގެ މެދުގައި ސީދާ މަޝްވަރާ ކުރުމަށް ނައިބް ރައީސް ޑރ.ޖަމީލަށް ނިންމިދާނެއެވެ. އޭރުން ޑރ.ޖަމީލަށް ޒީރޯއަކުން ހީރޯއަކަށް ވެވަޑައިގެންނެވުނީއެވެ.
ޤާނޫނީ ގޮތުން ބަލާއިރު އެކަން ކުރުމަށް ނައިބް ރައީސް ޑރ.ޖަމީލަށް އެއްވެސް ހުރަހެއް ނެތެވެ. ރައީސުލްޖުމްހޫރިއްޔާގެ ހުރިހާ މަސްއޫލިއްޔަތަކާއި ހަވާލުވެވަޑައިގެން މިވަގުތު އެހުންނެވީ އެބޭފުޅާއެވެ. މިރެއަކީ ނައިބް ރައީސްގެ ފަރާތްޕުޅުން ފެންނަމުންދާ 'ހަނުހުންނަވާ' އުސޫލު ދޫކޮށްލުމަށް ފަހު އަނެއްކާވެސް ހަރު އަޑުން ވާހަކަ ދައްކަވަން ފައްޓަވާ ރެއަށް ވުމަކީ އެކަށީގެންވާ ކަމެކެވެ.
ދެން ހުންނެވީ ރާއްޖޭގެ ސިޔާސީ 'ބައްޕަ' ކަމަށް އަމިއްލަފުޅަށް ޤަބޫލުކުރައްވާ މައުމޫން އަބްދުލް ޤައްޔޫމްގެ ބަހެވެ. ޑރ.ޖަމީލަކީ ސީދާ މައުމޫން ބޭނުންފުޅުވެގެން ރަނިން މޭޓަކަށް ހަމަޖެއްސެވި ބޭފުޅަކަށް ވާއިރު މިރޭ އެބޭފުޅާ ސިޔާސީ ކުށްވެރިން ދޫކޮށްލުން ފަދަ ފިޔަވަޅެއް އަޅުއްވައިފިނަމަ މައުމޫންގެ އެންމެ ބޮޑު ސިޔާސީ ހުވަފެންފުޅު ކަމުގައިވާ އެމަނިކުފާނުގެ ދަރިކަލަކު ވެރިކަމަށް ގެނައުމަށް އޮތް މަގު ކުރުވެގެން ދިއުމަކީ ވެސް އެކަށީގެންވާކަމެކެވެ.
އިދިކޮޅު ފަރާތްތަކުގެ ހިތްތަކަށް ވުރެ ވެރިކަން ކުރާ ޕީޕީއެމް އަަށް ތާއީދުކުރާ ބޭފުޅުންނާއި ސަރުކާރުގެ އިސްބޭފުޅުންގެ ހިތްތައް މިރޭ ވަރަށް ބާރަށް ތެޅެމުންދާނެ ކަން ކަށަވަރެވެ. ނައިބު ރައީސް ކުއްލި ފިޔަވަޅެއްގެ ގޮތުގައި ޖަލުގައި ހުންނެވި ކުރީގެ ރައީސް ނަޝީދާއި ކާނަލް ނާޒިމްގެ އިތުރުން ޝެއިޚް އިމްރާން ވެސް ދޫކޮށްލަފާނެ ބާއެވެ ؟
މަޤާމުން ވަކިކޮށްފިނަމަ އެބޭފުޅާގެ ސިޔާސީ ހަޔާތް ގާތްގަނޑަކަށް ނިމިގެންދާނެ ކަމަށް ބެލެވޭއިރު މިރޭ ހީރޯއަކަށް ވެވަޑައިގެން ސިޔާސީ ކުރިމަގު އުޖާލާކުރުމުގެ ފުރުސަތު ނައިބް ރައީސް ޑރ.ޖަމީލަށް އެބައޮތެވެ. "ރައީސް ޔާމީން އެނބުރި އަޔަސް ވެރިކަން ހަވާލު ނުކުރާނަމޭ، ނުވަތަ ރައީސް އޮފީހަށް ވެސް ނުވައްދާނަމޭ" ވިދާޅުވުމުގެ ފުރަސަތު ވެސް ނައިބް ރައީސަށް އެބައޮތެވެ.
\