މާލޭގެ އެކި ސަރަޙައްދުތަކުގައި ހުރި ކެމިކަލް ގުދަންތަކާއި ސްޓީލް ސްޓްރަކްޗަތަކުގެ މައުލޫމާތު އެއްކުރުމަށް ހިންގި "އޮޕަރޭޝަން ހިރާސް ފާސް" މާލޭގެ ބައިގައި ފުލުހުން ބައިވެރިވެެއްޖެ އެވެ.
މި އޮޕަރޭޝަނަކީ އެމްއެންޑީއެފުން އިސް ނައިގެން ކުރިއަށް ގެންދާ އޮޕަރޭޝަނެކެވެ.
އޮޕަރޭޝަންގެ މާލޭގެ ބައިގައި ޖުމުލަ 10 ޓީމު ބައިވެރިވެފައިވާ އިރު މި އިން ކޮންމެ ޓީމެއްގައި ވެސް މަދުވެގެން އެއް ފުލުހަކު މިހާރު ހަރަކާތްތެރިވެފައި ވެއެވެ.
މި އޮޕަރޭޝަނަކީ މާލޭގައި ހުރި ކެމިކަލް ގުދަންތަކާއި ސްޓީލް ސްޓްރަކްޗަތަކުގެ ތަފުސީލީ މައުލޫމާތު އެއްކޮށް، އެ ތަންތަނުގެ ރައްކާތެރިކަން ކަށަވަރުކުރުމާއި، އެފަދަ ތަންތަނުގެ ސަބަބުން ދިމާވެދާނެ ނުރައްކާތެރި ހާދިސާތަކަށް ތައްޔާރުވުމަށް ކުރިއަށް ގެންދިޔަ އޮޕަރޭޝަނެކެވެ.
އެގޮތުން އޮޕަރޭޝަނުގައި ފުރަތަމަ ތިން ދުވަހުގެ މަތިން، އިންސްޕެކްޝަން ޓީމުތަކުން ވަނީ، މީހުން ދިރިއުޅޭ 347 އިމާރާތާއި، ނުރައްކާތެރި ކެމިކަލް ގުދަންކުރާ 31 ގުދަނާ އަދި ކެމިކަލް ވިއްކާ 24 ފިހާރަ ބަލައި މައުލޫމާތު އެއްކޮށްފަ އެވެ.
މި މަހުގެ 1-15 އަށް ކުރިއަށް ގެންދާ އޮޕަރޭޝަނުގައި، ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް އޮޕަރޭޝަންގެ ތެރެއިން ދެނެގަންނާނެ އެވެ.