ބޮލީވުޑްގެ އެކްޓަރު ސަންޖޭ ކަޕޫރްގެ އަންހެން ދަރިފުޅު ޝަނާޔާ ކަޕޫރް ބޮލީވުޑަށް ނެރޭނީ "އާނކޯ ކީ ގުސްތާކިޔާ" ކިޔާ ފިލްމަކުން ކަމަށް ރިޕޯޓްތައް ބުނެފި އެވެ.
ޕީޕީން މޫން އިން ރިޕޯޓްކޮށްފައިވާ ގޮތުގައި މި ފިލްމަކީ މަގުބޫލު ވެބް ސީރީޒްތައް ކަމަށްވާ "ބްރޯކެންޑް ބަޓް ބިއުޓިފުލް" އާއި "އަޕަހާރަން" ގެނެސްދިން ސަންތޯޝް ސިންގް ޑައިރެކްޓްކުރަން ހަމަޖެހިފައިވާ ފިލްމެކެވެ. ނިރަންޖަން އައްޔަރުގެ ސްކްރިންޕްލޭއަކަށް ހަދަން ހަމަޖެހިފައިވާ "އާނކޯ ކީ ގުސްތާކިޔާ" ގެ ބަތަލަކީ ވިކްރާންތު މަސީ އެވެ.
ޕީޕިން މޫން އިން ބުނި ގޮތުގައި ޕްރޮޑިއުސަރުން ކަމަށްވާ މާންސީ ބަގްލާ އާއި ވަރޫން ބަގްލާގެ ފިލްމު ކުންފުނި، މިނީ ފިލްމްސް ހަދާ މި ފިލްމުގައި ކިޔައި ދޭނީ ލޯފަން މިއުޒިޝަނަކާއި ސްޓޭޖް ތަމްސީލުތައް ކުޅޭ ބަތަލާއަކާ ދެމެދު އުފެދޭ ގުޅުމެއްގެ ވާހަކަ އެވެ. އަދި މި މަހުގެ ފަހުކޮޅު ޝޫޓިން ފަށަން ހަމަޖެހިފައިވާ ފިލްމުގެ މަންޒަރުތައް އިންޑިއާގެ އިތުރުން ޔޫރަޕްގައި ވެސް ނަގާނެ އެވެ.
"އާނކޯ ކީ ގުސްތާކިޔާ" ސިނަމާތަކަށް ގެންނާނީ އަންނަ އަހަރުގެ މެދުތެރޭގަ އެވެ.
ޝަނާޔާ، 24، ބޮލީވުޑަށް ނެރެން އާ ފިލްމަކަށް ތައްރުވަމުން އަންނަ ވާހަކަ މީޑިއާތަކުން ރިޕޯޓްކުރި އިރު، އޭނަ ބޮލީވުޑަށް ނެރެން އިއުލާންކުރި ފުރަތަމަ ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަނުން 2021 ގައި އިއުލާންކުރި "ބޭދަޅަކް" އެވެ. އޭގެ ބަތަލުންނަށް ނެގީ ދާދި ފަހުން ރިލީޒްކުރި ދަރުމާގެ "ކިލް" އިން ތައާރަފުކުރި ލަކްޝް ލަލްވާނީ މި ފަހުން ސަޕޯޓިން ރޯލުތަން ފެންނަ ގުރްފަތޭ ޕިރްޒާދާ އެވެ.
"ބޭދަޅަކް" އަކީ "ދަޅަކް" އާއި "ހަމްޓީ ޝަރުމާ ކީ ދުލްހަނިއާ" އާއި "ބަދުރީނާތު ކީ ދލްހަނިޔާ" ގެ ޑައިރެކްޓަރު ޝިޝާންކް ކައިތާން ލިޔެ، ޑައިރެކްޓްކުރަން އިއުލާން ކުރި ފިލްމެކެވެ. އެކަމަކު ފިލްމުގެ ޕޯސްޓަރުތަކެއް ދައްކާލައި، ފިލްމު އިއުލާންކުރި ނަމަވެސް، ފަހުން އޭގެ މަސައްކަތް ވަނީ ހުއްޓާލައިފަ އެވެެ.
ނަމަވެސް ކޮން ސަބަބަކާ ހުރެ ކަމެއް ދަރުމާ އިން ނުބުނެ އެވެ. އަދި "ބޭދަޅަކް" ގެ އެއްވެސް ވާހަކައެއް ވެސް އެ ސްޓޫޑިއޯ އިން ފަހަކުން ނުދައްކަ އެެވެ.
މިދިޔަ އަހަރު ޝަނާޔާ ވަނީ މަަޝްހޫރު މަލަޔާމް އެކްޓަރު މޯހަލާލުގެ ފލްމަމަށް ސޮއިކޮށް، އޭގެ މަސައްކަތް ވެސް ނިންމައިފަ އެވެ. އެއީ "ރުޝާބާ" ކިޔާ ފިލްމެކެވެ.
ބައެއް އިޝްތިހާރުތަކުން ފެނިފައިވާ އަދި އިންސްޓަގްރާމްގައި ވެސް މަޝްހޫރު ޝަނާޔާ އަކީ ފިލްމީ ތަރިން ކަމަށްވާ ސޯނަމް ކަޕޫރާއި އަރުޖުން ކަޕޫރާއި ޖާންވީ ޖަޕޫރްގެ އިތުރުން ހުޝީ ކަޕޫރްގެ ކަޒިންއެކެވެ. އޭނަގެ ބައްޕަ ސަންޖޭ އަކީ އަނިލް ކަޕޫރާއި ބޯނީ ކަޕޫރްގެ ކޮއްކޮ އެވެ.