ޓީޗަރުންގެ ނަފުސާނީ ދުޅަހެޔޮކަން ކަށަވަރުކުރުމަށް ގިނަ ފިޔަވަޅުތަކެއް އަޅުއްވާނެ ކަމަށް އެޑިއުކޭޝަން މިނިސްޓަރު ޑރ. އިސްމާޢިލް ޝަފީޢު ވިދާޅުވެއްޖެ އެވެ.
މި އަހަރުގެ ޓީޗަރުންގެ ދުވަސް ފާހަގަކުރުމަށް ގައުމީ ޔުނިވރސިޓީގެ ސްޓޫޑެންޓް ޔޫނިއަނުން އިސް ނަގައިގެން ބޭއްވި ޖަލްސާ ޝަރަފުވެރިކޮށް ދެއްވައި މިނިސްޓަރު ވިދާޅުވީ ޓީޗަރުންނާ ގުޅޭ ގިނަ ކަންބޮޑުވުންތަކެއް އެބަހުރި ކަމަށާއި އޭގެ ތެރެއިން އެއް ކަމަކީ އެ މީހުންނަށް ވަރަށް ބުރަކޮށް މަސައްކަތް ކުރާ ބަޔަކަށްވެފައި ޓީޗަރުންގެ ނަފްސާނީ ދުޅަހެޔޮ ކަން ކަމަށެވެ.
"ރާއްޖޭގައި މަސައްކަތްކުރާ އަށްޑިހަ ޕަސަންޓް މުދައްރިސުންނަކީ އަންހެން މުދައްރިސުން. އެ މީހުން ބުރަ މަސައްކަތް ކުރުމަށް ފަހު ގެއަށް އައިސް، ގެވެހި ކަންކަން ކުރަން ޖެހެނީ ވެސް އެ މީހުންނަށް،" މިނިސްޓަރު ވިދާޅުވި އެވެ. "އޭގެ ސަބަބުން އިތުރު ބުރައެއް އެމީހުން އުފުލަން އެ ޖެހެނީ."
ޝަފީއު ފާހަގަ ކުރެއްވި ގޮތުގައި ޓީޗަރުންނާ ބެހޭ ގާނޫނެއް ވުޖޫދުވެގެން އައިރު، އެ މީހުންގެ ނަފުސާނީ ދުޅަހެޔޮކަމާ ބެހޭ އެއްވެސް ބައެއް އޭގައި ނެތް ކަމަށެވެ. އެހެންވެ އެކަން ކަށަވަރުކުރެވޭނެ ގޮތެއް ނޯންނަ ކަމަށާއި މިއީ ޓީޗަރުން ވެސް ފާހަގަކުރާ ކަންބޮޑުވުމެއް ކަމަށް މިނިސްޓަރު ވިދާޅުވި އެވެ.
ޝަފީއު ވިދާޅުވީ ހުކުރު ދުވަހަކީ ޓީޗަރުން ސްކޫލްތަކުގައި އެއްވެސް މަސައްކަތެއް ނުކުރާ ގޮތަށް ނިންމި ނިންމުމަކީ އެ މީހުންގެ ނަފުސާނީ ދުޅަހެޔޮކަން ކަށަވަރު ކުރުމަށް އެޅުނު މުހިއްމު އެއް ފިޔަވަޅު ކަމަށެވެ.
"ހުކުރު ދުވަހު މަސައްކަތް ނުކުރާ ގޮތަށް ނިންމީ އެ މީހުންނަށް ހުސް ވަގުތު ކޮޅެއް ހޯދައި ދޭންވެގެން. އެ މީހުން ޢާއިލާއާ އެކީގައި ވަގުތު ހޭދަކުރަން ވަގަތުކޮޅެއް ފަހިކޮށް ދިނުން،" މިނިސްޓަރު ވިދާޅުވި އެވެ. "އަދި މުދައްރިސުންނަށް ފަހި މަސައްކަތު މާޙައުލެއް ވެސް ޤާއިމްކޮށް ދޭން ޖެހޭ. އެކަމަށް ވެސް އަޅުގަނޑުމެން މި އަންނަނީ މަސައްކަތް ކުރަމުން."
މިދިޔަ ހަފުތާގައި ބޭއްވި 7 ވަނަ އިންޓަނޭޝަނަލް ޓީޗާސް ކޮންފަރެންސް ޝަރަފުވެރިކޮށް ދެއްވައި ދެއްކެވި ވާހަކައިގައި ފަސްޓްލޭޑީ ސާޖިދާ މުހައްމަދު ވެސް ވަނީ ޓީޗަރުންގެ ދުޅަހެޔޮ ކަމަށް އިސްކަން ދޭން ޖެހޭކަން ފާހަގަ ކުރައްވައިފަ އެވެ.