މި އަހަރުގެ އެންމެ އުންމީދީ ބޮލީވުޑްގެ ފިލްމުތަކުގެ ތެރޭގައި ހިމެނޭ "ސިންގަމް އެގެއިން" ގެ ޓްރެއިލާ މިއަދު ދައްކާލައިފި އެވެ.
މުމްބާއީގައި މީޑިއާތަކާ އެކީ މެންދުރު ބޭއްވި ކުލަގަދަ އިވެންޓެއްގައި ފިލްމު ޓްރެއިލާ ދައްކައިލި އިރު، ފިލްމުގެ ގިނަ ކާސްޓުން ބައިވެރިވި އެވެ. "ސިންގަމް އެގެއިން" އަކީ ޑައިރެކްޓަރު ރޯހިތު ޝެޓީގެ ކޮޕް ޔުނިވާސްގައި ހިމެނޭ އަޖޭ ދޭވްގަންގެ "ސިންގަމް" ފްރެންޗައިޒްގެ ތިން ވަނަ ބައެވެ.
އަންނަ މަހުގެ 1 ގައި ސިނަމާތަކަށް ގެންނަން ހަމަޖެހިފައިވާ ފިލްމުގެ ކާސްޓްގައި ދީޕިކާ ޕަދްކޯން، ކަރީނާ ކަޕޫރް، ޓައިގާ ޝްރޮފް، އަރުޖުން ކަޕޫރް، ޖެކީ ޝްރޮފް، އަޝުތޯޝް ރާނާ އަދި ޝްވޭތާ ތިވާރީ (ޕްރޭނާ) ވެސް ހިމެނެ އެވެ.
"ސިންގަމް އެގެއިން" ގެ ކާސްޓްގައި ދީޕިކާގެ ފިރިމީހާ މަޝްހޫރު އެކްޓަރު ރަންވީރް ސިންގް ވެސް ހިމެނެ އެވެ. އޭނަ ފިލްމުގައި ފެންނާނީ ކޮޕް ޔުނިވާސްގެ ދެވަނަ ފިލްމު ކަމަށްވާ "ސިމްބާ" ގައި ކުޅުނު ފުލުސް ކެރެކްޓާއިންނެވެ. އަދި އަކްޝޭ ކުމާރު ވެސް ފުލުހެއްގެ ގޮތުގައި އޭނަގެ ފުލުސް ކެރެކްޓާ "ސޫރިއަވަންޝީ" ގެ ގޮތުގައި ފެންނާނެ އެެވެ.
"ސިންގަމް" ފްރެންޗައިޒްގެ ފުރަތަމަ ދެ ފިލްމަކީ 2011 ގެ "ސިންގަމް" އާއި 2014" ގެ "ސިންގަމް ރިޓާންސް" އެވެ
ބޮލީވުޑްގެ އެންމެ ކާމިޔާބު ޑައިރެކްޓަރުންގެ ތެރޭގައި ހިމެނޭ ރޯހިތު އެންމެ ފަހުން ގެނެސްދިން ފިލްމަކީ ބެލުންތެރިންގެ ފިނި ތަރުހީބެއް ލިބުނު 2022 ގެ "ސާކަސް" އެވެ.