އެސްޓީއޯ އާ ހަވާލުކޮކޮށްގެން ރާއްޖެ ގެނައި ކުއްލި ހާލަތުގައި ފަރުވާދޭ ހަަތަރު ޕެރަމެޑިކް އެމްބިއުލާންސް ގެ ތެރެއިން އެމްބިއުލާންސެއް ސ.ހިތަދޫ ރީޖަނަލް ހޮސްޕިޓަލާއި ހަވާލުކޮށްފިއެވެ.
އެސްޓީއޯ ހެޑް އޮފީހުގައި ބޭއްވި ރަސްމިއްޔާތެއްގައި އެ އެމްބިއުލާންސް ހިތަދޫ ހޮސްޕިޓަލާއި ހަވާލުކޮށްދެއްވީ ހެލްތް މިނިސްޓަރު އިރުތިޝާމް އާދަމެވެ. ހިތަދޫ ރީޖަނަލް ހޮސްޕިޓަލްގެ ފަރާތުން އެމްބިއުލާންސްގެ ލިޔުމާއި ހަވާލުވެވަޑައިގަތީ ޝާހް ސައީދެވެ.
އެރަސްމިއްޔާތުގައި ދެން އެމްބިއުލާންސް ހަވާލުކުރުމުގެ ލިޔުން ދީފައިވަނީ އައިޖީއެމްއެޗާއި ލ. ގަމު ރީޖަނަލް ހޮސްޕިޓަލް އަދި ޏ.ފުވައްމުލަކު ހޮސްޕިޓަލަށެވެ.
އިއްޔެ ބޭއްވި ރަސްމިއްޔާތުގައި، ހެލްތް މިނިސްޓަރު އިރުތިޝާމް ވިދާޅުވި ގޮތުގައި ދުނިޔޭގެ އެހެން ހިސާބުތަކާ އެއް ފެންވަރެއްގައި ރާއްޖޭގައި ވެސް ސިއްހީ ހިދުމަތް ދިނުމަކީ މުހިއްމު ކަމެކެވެ. މި އެމްބިއުލާންސްތަކުގެ ސަބަބުން އެކަން ހާސިލްކުރުމަށް އެހީވެދޭނެ ކަމަށް އޭނާ ވިދާޅުވި އެވެ.
ހަތަރު ޕެރަމެޑިކް އެމްބިއުލާންސަށް 4.4 މިލިއަން ރުފިޔާ ހަރަދުވި ކަމަށް އެސްޓީއޯ ވަނީ ބުނެފައެވެ.