މޫސުމާ ބެހޭ މައި އިދާރާގެ ޑޮޕްލާ ވެދާ ރާޑަރަށް ދިމާވި މައްސަލަ މިއަދު ހައްލުކޮށްފައިވާ ކަމަށް އެތަނުން ބުނެފި އެވެ.
މެޓް އޮފީހުން ބުނީ އެއަށް ދިމާވި ޓެކްނިކަލް މައްސަލަ ހައްލު ނުކުރެވި ގިނަ ދުވަސްތަކެއްވުމަށް ފަހު، މަރާމާތުކޮށް މިއަދު އަލުން ބޭނުން ކުރަން ފަށާފައިވާ ކަމަށެވެ. މި ޑޮޕްލާ ވެދާ ރާޑަރަކީ ދުނިޔޭގެ ކުރިއަރާފައިވާ އެހެން ގައުމުތަކުގައި ވެސް މޫސުން ލަފާކުރާ ގޮތް ބެލުމަށް ބޭނުން ކުރާ ފަދަ އެންމެ ފަހުގެ ޓެކްނޮލޮޖީ އެކުލެވޭ ރާޑަރެކެވެ.
މެޓް އޮފީހުން ބުނީ މި ރާޑަރުން ހުޅުމާލެ އިން ފެށިގެން ގާތްގަނޑަކަށް 250 ކިލޯމީޓަރުގެ ރޭޑިއަސްގެ ތެރޭގައި ހިނގާ މޫސުމާ ބެހޭ މައުލޫމާތު ވަގުތުން ވަގުތަށް ދެނެގަނެވޭ ކަމަށެވެ. އަދި މި ރާޑަރުގެ އެހީގައި ވާރޭ ވެހެމުންދާ ސަރަހައްދުތަކާއި ވާރޭ ވެހޭ ބޯމިނާއި ވާރޭ ވެހޭ ވިލާ ދަތުރު ކުރަމުން މިސްރާބާއި ބާރު މިން ވެސް ދެނެގަނެވޭ ކަމަށެވެ. މީގެ އިތުރުން ވިލާގަނޑު ވަކި ސަރަހައްދަކަށް ލައްވާލާނެ ކަމަށް އަންދާޒާ ކުރެވޭ ވަގުތު ވެސް ޑޮޕްލާ ވެދާ ރާޑަރުން ދެނެގަނެވެ އެވެ.
ހަމަމިއާ އެކި ފަށަތަކުގައި ވައިގެ މައުލޫމާތު ވެސް މި ރާޑަރު މެދުވެރިކޮށް ހޯދެ އެވެ.