އިންޑިއާގެ ކޮންސިއުލޭޓެއް އައްޑޫ ސިޓީގައި ގާއިމުކުރުމާ ގުޅޭގޮތުން މަޝްވަރާކޮށްފި އެވެ.
މި މަޝްވަރާތައް ކުރިއަށް ގެންގޮސްފައިވަނީ ރައީސް ޑރ. މުހައްމަދު މުއިއްޒު އިންޑިއާ އަށް ކުރައްވަމުން ގެންދަވާ ދަތުރުފުޅުގައި އެގައުމުގެ ބޮޑުވަޒީރު ނަރެންދްރަ މޯދީއާއެކު ބޭއްވި ބައްދަލުކުރެއްވުމުގަ އެވެ.
މި މަޝްވަރާ ބައްދަލުވުމަށްފަހު މީޑިއާތަކަށް ދެއްވި ޕްރެސް ސްޓޭޓްމެންޓުގައި މޯދީ ވިދާޅުވީ އިންޑިއާގެ ކޮންސިއުލޭޓެއް އައްޑޫގައި އަދި ރާއްޖޭގެ ކޮންސިއުލޭޓެއް ބެންގަލޫރުގައި ގާއިމުކުރުމާ ގުޅޭގޮތުން މަޝްވަރާ ކުރެވުނު ކަމަށެވެ. މީގެ ސަބަބުން ދެ ގައުމުގެ ރައްޔިތުންގެ މެދުގައި އޮންނަ ގުޅުން އިތުރަށް ބަދަހިވެގެންދާނެ ކަމަށް މޯދީ ވިދާޅުވި އެވެ.
މޯދީ ވަނީ ރާއްޖެ އަށް ތަފާތު އެކި ދާއިރާތަކުން އެހީތައް ދިނުމުގައި އިންޑިއާ ދެމި އޮންނާނެ ކަމަށް ވިދާޅުވެފަ އެވެ.
އިންޑިއާގެ ވެރިރަށް ނިއު ދިއްލީގައި ދިވެހި ހައިކޮމިޝަން ގާއިމުކޮށްފައިވާ އިރު، ޓްރިވެންޑްރަމްގައި ދިވެހި ކޮންސިއުލޭޓެއް ވެސް ހުރެ އެވެ.
ރާއްޖޭގެ އެންމެ ދެކުނުގެ ސިޓީ ކަމަށްވާ އައްޑޫގައި އިންޑިއާގެ ކޮންސިއުލޭޓެއް ގާއިމު ކުރުމުގެ ވިސްނުން ގެންގުޅޭ ކަމަށް އިންޑިއާ ފުރަތަމަ ހާމަކޮށްފައި ވަނީ 2021 ގެ މެެއި މަހުގެ ތެރޭގަ އެވެ. އަދި އެކަމާ ގުޅިގެން އޭރުގެ ރައީސް އިބްރާހީމް މުހައްމަދު ސޯލިހުގެ ސަރުކާރުން އެކަމަށް ހުއްދަ ދޭނެކަމުގެ އިޝާރާތެއް ވެސް ދީފައިވެ އެވެ.
މިކަމާ ގުޅިގެން އޭރު އިދިކޮޅުގައި އޮތް އަދި މިހާރު ވެރިކަން ކުރާ ޕީއެންސީ/ޕީޕީއެމް ކޯލިޝަނުން ކަންބޮޑުވުން ފާޅުކުރި އެވެ. އަދި "ސޭވް އައްޑޫ" ގެ ނަމުގައި އޭރު ކެމްޕޭނެއް ވެސް ހިންގާފައިވެ އެވެ. އައްޑޫގައި އިންޑިއާގެ ކޮންސިއުލޭޓެއް ގާއިމު ކުރަން ކުރިން ނިންމުމުން ފާޑު ވިދާޅުވި ބޭފުޅުންގެ ތެރޭގައި މިހާރުގެ ހޯމް މިނިސްޓަރު އަލީ އިހުސާން ހިމެނިވަޑައިގަންނަވަ އެވެ.