ކުރީގެ ރައީސް މުހައްމަދު ނަޝީދަކީ ދިވެހި ގައުމަށް ގިނަގުނަ ހިދުމަތްތަކެއް ކޮށްދެއްވާފައި ވާ ފަރާތެއް ކަމަށާއި އެމަނިކުފާނު ތަންފީޒް ކުރައްވަމުން ގެންދަވާ ޙުކުމަށް "ދުލެއް ދެއްވަން" ރައްޔިތުން މަޖިލީހުގެ ތިމަރަފުށީ ދާއިރާގެ މެންބަރު މުހައްމަދު މުސްތޮފާ ރައީސް އަބްދުﷲ ޔާމީނަށް ގޮވާލައްވައިފިއެވެ.
ތިމަރަފުށީގެ ފުޓްސަލް ދަނޑު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން، މުސްތޮފާ ވިދާޅުވީ ރައީސް ނަޝީދަށް ރަނގަޅު ގޮތްތައް ވާން އޭނާ އަމިއްލަފުޅަށް އެދި ވަޑައިގަންނަވާ ކަމަށާއި ނަޝީދަށް ދުލެއް ދެއްވުމަށް ރައީސް ޔާމީނަށް އޭނާ ދަންނަވަނީ ރައީސް ނަޝީދު ރާއްޖެއަށް ގިނަގުނަ ހިދުމަތްތަކެއް ކޮށްދެއްވާފައިވާ ކަމަށެވެ.
މުސްތޮފާ އާއި ގުޅޭ ގޮތުން ތަފާތު ވާހަކަތައް ދައްކަވާ ފަރާތްތަކަށް ރައްދުދެއްވަމުން ވިދާޅުވި ގޮތުގައި އޭނާއަކީ "ސިޔާސީ ކޮންޓްރެކްޓެއްގައި ހުރި މީހެއް" ކަމަށެވެ.
ރައީސް ނަޝީދަށް "ދުލެއް ދެއްވުމަށް" ރައީސް ޔާމީނަށް މުސްތޮފާ ގޮވާ ލެއްވިއިރު ރައީސް ނަޝީދުގެ މައްޗަށް އިއްވާފައިވާ ޙުކުމާއި މެދު ރައްޔިތުން ނުރުހުންވެފައި ވާތީ، ޤައުމީ މަސްލަޙަތައް ބެއްލެވުމަށްވެސް ރައީސް ޔާމިނަށް މުސްތޮފާ ވަނީ މީގެ ކުރިން އިލްތިމާސް ކުރައްވާފައިވާކަން ފާހަގަކޮށްލެވެއެވެ.
މުސްތޮފާ މިފަދަ ގޮތަކަށް ވާހަކަ ދައްކަވާފައިވާއިރު ސަރުކާރުގެ ތެރޭގައި ވެސް ރައީސް ނަޝީދު ގޭބަންދަށް ބަދަލު ކުރުމުގެ ވާހަކަތަކެއް ދެކެވެމުންދާ ކަމަށްވެއެވެ.