އަންނަ ހުކުރު ދުވަހު ރިލީޒްކުރަން ހަމަޖެހިފައިވާ އެކްޝަން ތުރިލާ "ޖިގްރާ" ގެ ޓައިޓްލް ލަވަ އެ ފިލްމުގެ ބަތަލު ވެދާންގް ރައިނާގެ އަަޑުން މިއަދު ގެނެސްދީ އެވެ.
"ޖިގްރާ" ގެ ނަން ދީފައިވާ މި ލަވައިން ޒުވާން އުންމީދީ އެކްޓަރުގެ ލަވަކިޔުމުގެ ހުނަރު ވަރަށް ބޮޑަށް ވަނީ ދައްކާލައިފަ އެވެ. ލަވައިގެ މިއުޒިކް ހެދީ އަޗިންތެވެ، އަދި ލަވައިގެ ޅެން ހެދީ ވަރޫން ގްރޯވާ އެވެ.
"ޖިގްރާ" އަކީ ދެބެއިންގެ މެދުގައި އޮންނަ ގާތް ގުޅުމާއި ކޮއްކޮ ސަލާމަތްކުރަން ދައްތަކު ވާ ގުރުބާނީ ދައްކުވައި ދޭނެ ވަރަށް ޖަޒުބާތީ ފިލްމަކަށް ވާނެ އެވެ. މީގެ ލީޑް ތަރިންނަކީ އާލިއާ ބަޓާއި ވެދާންގް އެވެ. ފިލްމުގައި ވެދާންގް ކުޅެފައި ވަނީ އާލިއާގެ ކޮއްކޮގެ ރޯލެވެ.
އޭނަ އަކީ މިދިޔަ އަހަރު ނެޓްފްލިކްސް އިން ގެނެސްދިން "ދި އާޗީސް" އިން ތައާރަފުވި އެކްޓަރެކެވެ. "ޖިގްރާ" ގެ ޓައިޓްލް ލަވަ ވެދާންގެ އަޑުން ގެނެސްދިން އިރު، ފިލްމުގެ ޓީޒާ ގެނެސްދިން އިރު، އޭގައި ހިމަނާފައި އޮތް ކުރީގެ މަޝްހޫރު ލަވަ "އޭކް ހަޒާރޯ މޭ މޭރޭ ބެހެނާ" އަކީ ވެދާންގެ އަޑުން ގެނެސްދީފައި އޮތް ލަވައެކެވެ.
ފާހަގަކޮށްލެވޭ އަނެއް ކަމަކީ މި ފިލްމުގެ ޕްރޮމޯނަށް އާލިއާ ވެސް ލަވައެއް ކިޔާފައިވާކަމެވެ. މިދިޔަ މަހުގެ ތެރޭގައި ދައްކައިލި އެ ލަވަ ކިޔާފައި ވަނީ ކުރިން ވެސް ލަވަތަކެއް ރެކޯޑްކޮށްފައިވާ ބަތަލާ އާއި އެކްޓަރު ދިލްޖީތު ދޮސަންޖެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި "ޖިގްރާ" އަކީ ކަރަން ޖޯހަރްގެ ދަރުމާ ޕްރޮޑަކްޝަނާއި އާލިއާގެ ފިލްމު ކުންފުނި، އިޓާނަލް ސަންޝައިންގެ އިތުރުން ވައޮކް 18 ގުޅިގެން ގެނެސްދޭ ފިލްމެކެވެ. މީގެ ޑައިރެކްޓަރަކީ ވަސަން ބާލާ އެވެ.