ކޮންމެ މީހަކު ކޮންމެ އެއްޗެއް އުފެއްދި ކަމަށް ވިޔަސް އެ އުފެއްދި އެއްޗެއް ބޭނުންކުރާނެ ގޮތުގެ ފުރިހަމަ ތަފުޞީލް (ޔޫޒާގައިޑް) އެއާ އެކު އޮންނަން ޖެހޭނެ އެވެ. އެހެނީ އެ އެއްޗެއް ބޭނުން ކުރަން ޖެހޭނީ އެ ޔޫޒާގައިޑްގައިވާގޮތަށް، އެކަމަށް ފުރިހަމަ ސަމާލުކަން ދީގެން ކަމަށްވާތީ އެވެ. އެހެން ނޫނީ އެ ބޭނުން ކުރުމުގައި ދަތިތަކާ ކުރިމަތިވެ އަދި އޭގެ އުމުރު ކުރުވާ ގޮތް ދިމާވާނެ އެވެ. އަދި އެއަށް މައްސަލައެއް ދިމާވެއްޖެނަމަ މަރާމާތުކޮށް އިސްލާހުކުރަން ގެންދަން ވާނީ، އެކަން ރަނގަޅަށް ދަންނަ މޭސްތިރީއެއްގެ ކައިރިއަށެވެ.
ގަޑިއެއް ހަލާކުވީމާ ވަޑާންގެއަކަށް ގެންގޮސްގެން ނުވާނެއެވެ. ކަމެއްގެ މަޤްޞަދު ޙާޞިލު ވާނީ އެކަމަކާ ގުޅުން ހުރި ކަންތައްތަކުގެ މައްޗަށް ކަމަށްވާތީ އެވެ.
މާތްﷲ ވަނީ ތިބާ ނެތުމުގެ ތެރެއިން ވުޖޫދަށް ގެންނެވުމަށްފަހު ތިބާ ތިބާގެ ޙަޔާތުގެ ދުވަސްތައް ހޭދަކުރަން އޮތް ހެޔޮގޮތާއި ނުބައިގޮތް ކީރި ޤުރްއާން އާދެ! “ޔޫޒާގައިޑް”ގައި ބަޔާން ކޮށްދެއްވާފަ އެވެ. އެއަށް ފަހު އެ ފޮތުގައި ހުރި ހުރިހާ ވާހަކައެއް ތިބާއަށް އުނގަންނައި ދެއްވުމަށް އެކަލާނގެ ވަނީ ނަބިއްޔަކުވެސް ފޮނުއްވަވާފަ އެވެ. އަދި ތިބާގެ ޙަޔާތުގެ ދުވަސްތައް ތިބާ ހެޔޮގޮތުގައި ހޭދަކޮށްފިނަމަ ހުރި ދަރުމައާއި ޘަވާބުގެ ވާހަކަވެސް މާތްﷲ ވަނީ ބަޔާން ކުރައްވާފައެވެ. އެދުވަސްތައް ތިމާހިތުހުރި ގޮތަކަށް ”ޔޫޒާގައިޑް” އާ ޚިލާފަށް ހޭދަކޮށްފި ނަމަ ދެ ދުނިޔޭގައި ވެސް ތިބާއަށް ވަނީ ގެއްލުމާއި ހަލާކުކަން ވެސް މާތްﷲ ވަނީ އަންގަވާ ދެއްވާފަ އެވެ.
ވީމާ ސިކުނޑީގެ ބޭނު ންކުރުމުގައި ސިކުނޑި އުފެއްދެވި ފަރާތުގެ ”ޔޫޒާގައިޑް” ބަލާށެވެ. ސިކުނޑި އަށް ރައްކާތެރި ވުމުގައި އެކަލާނގެ އެންގެވިގޮތަށް ތިބާގެ އުޅުމާއި ގުޅުން ބައްޓަން ކުރާށެވެ.
ގަޑިއަށް މައްސަލަދިމާވުމުން ގަޑި ހަދަން ދަންނަމީހާ ކައިރިއަށް ދާ އުސޫލުން ތިބާއަށް ދިމާވާ ކޮންމެ ކަމެއް އިޞްލާޙް ކުރުމަށް ތިބާގެ ”ޔޫޒަރގައިޑް ” ބަލާ ތިބާ ހެއްދެވި ފަރާތަށް ރުޖޫޢަވާށެވެ.
ވީމާ އަވަހަށް ފިލާވަޅު ދަސްކޮށް ހަނދާނުގައި ބެހެއްޓުމަށްޓަކައި:
* މާތްﷲ އަށް ފުރިހަމައަށް ހެޔޮހިތުން ކިޔަމަންތެރިކަން އަދާކުރާށެވެ.
* ނަމާދު، އޭގެ ވަގުތުން ޖަމާޢަތުގައި ކުރާށެވެ.
* މަންމަ އާއި ބައްޕައަށް ވަރަށްބޮޑަށް ހެޔޮކޮށް ހިތާށެވެ.
* މުދައްރިސަށް އިޙްތިރާމް ކުރާށެވެ. (ކޮންމެ ދީނެއްގެ މީހަކުކަމުގައި ވިޔަސް ކަންއޮތީ މިގޮތަށެވެ.)
* ފަތިސް ނަމާދު ފަހުން، އިރު އެރުމުގެ ކުރިން ނުނިދާށެވެ.
* ޢަޞުރު ނަމާދު ފަހުން، ޢިޝާނަމާދު ކުރިން ނުނިދާށެވެ.
* ކާ ވަގުތުތަކުގައި ބަނޑަށް އުނދަގޫ ވާވަރަށް ގިނައިން (ލޮޑުވެކަންނެތްވާވަރަށް) ނުކާށެވެ.
* އެއްޗެއް ނުކައި ހުސްބަނޑާ ހުރެ ފިލާވަޅު ދަސްކުރަން ނުފަށާށެވެ.
* ބޭކާރު ވާހަކަ ނުދައްކާށެވެ. ފައިދާއެއް ނެތް ވީޑިއޯ ނުބަލާށެވެ. ބޭކާރު ލިޔުން ނުކިޔާށެވެ.
* ގިނައިން ފެންބުއިމަށް އާދަ ކުރާށެވެ.
* ދުވާލަކު ކޮންމެވެސް މޭވާއެއް ކާށެވެ.
* ބަދަން އަދި ހިކި މޭބިސްކަދުރު ގިނަގިނައިން ކައި ހަދާށެވެ.
* ކާމިޔާބު ވާނެކަމުގެ ފުރިހަމަ އުންމީދާއި ޢަޒުމާއެކުގައި މަސައްކަތް ފަށާށެވެ.
މި ސަބަބުތަކުގައި ހިފައި އަވަހަށް ދަސްވުމަށާއި ދަސްކުރާ ތަކެތި ހަނދާނުގައި ހަރުލެއްވުމަށް އެދި މާތްﷲ އަށް ދުޢާ ކުރާށެވެ.
ހުރިހާ ކަމެއްމެ މޮޅަށް ދެނެވޮޑިގަންނަވަނީ ގަދަ ކީރިތި ވަންތަ މާތްﷲ އެވެ.
މަސްދަރު: ނޫރުލްއިސްލާމް