ރިއަލިޓީ ޝޯ "ބިގް ބޮސް" އިން މަޝްހޫރުކަން ހޯދި އިންޑިއާގެ ސެލެބްރިޓީ ޝެހެނާޒް ގިލް ސަނާ) ކުޅެފައިވާ އައިޓަމް ލަވައެއް މިއަދު ދައްކާލައިފި އެވެ.
އޭނަގެ ފަރި ނެށުންތަކެއް ފެނިގެންދާ މި ލަވަ އަކީ އަންނަ ހުކުރު ދުވަހު ރިލީޒްކުރަން ހަމަޖެހިފައިވާ ރާޖްކުމާރު ރާއޯ އާއި ޓްރިޕްތީ ދިމްރީގެ "ވިކީ ވިދިއާ ކާ ވޯ ވާލާ ވީޑިއޯ" ގެ ލަވައެކެވެ. ސަނާއާ އެކީ ރާޖް ވެސް ފެންނަ ލަވަ އަކީ "ސަޖްނާ ވޭ ސަޖްނާ" އެވެ.
މި ލަވައަކީ ކަރީނާ ކަޕޫރްގެ 2004 ގެ ފިލްމު "ޗަމޭލީ" އަށް މަޝްހޫރު ލަވަކިޔުންތެރިޔާ ސުނީދީ ޗޯހަން ކިޔާފައިވާ "ސަޖްނާ ވޭ ސަޖްނާ" ގެ އާ ވާޝަނެކެވެ. އާ ލަވައިގައި ސުނީދީއާ އެކީ ދިވްޔާ ކުމާރު ވެސް ހިއްސާވެފައިވެ އެވެ. އާންމުންގެ ތެރޭގައި ކުރިން ވެސް ވަރަށް ބޮޑު މަގުބޫލު ކަމެއް ހޯދި މި ލަވައިގެ މިއުޒިކް ހެދީ ސަންދޭޝް ޝަންދަލިއާ އެވެ.
"ބިގް ބޮސް 13" ގައި ވާދަކޮށްގެން ލިބުނު މަޝްހޫރުކަމާ އެކީ ސަނާ އަކީ މިހާރު ބޮލީވުޑްގެ ފިލްމުތަކުން ވެސް ފެންނަ ބަތަލާއެކެވެ. އެކަމަކު "ސަޖްނާ ވޭ ސަޖްނާ ވޭ" އަކީ ފިލްމަކަށް އޭނަ ކުޅުނު ފުރަތަމަ އައިޓަމް ލަވަ އެވެ. ލަވައިގައި ސަނާ ދައްކާފައިވާ ނެށުމުގެ ހުނަރާއި މޫނުމަތީގެ އެކްސްޕްރެޝަންތަކަށާއި ހަށިގަނޑަށް ގެނެސްފައިވާ ލޫޅާފަތި ބަދަލަށް ވަރަަށް ގިނަ ބަޔަކު ލަވައިގެ ޔޫޓިއުބް ލިންކަށް ކޮމެންޓްކޮށްފައިވެ އެވެ.
ސަނާ މި ފަހުން ފެނިގެން ދިޔަ ފިލްމުތަކުގެ ތެރޭގައި އަނިލް ކަޕޫރްގެ ދަރިއެއް ކަމަށްވާ ރިއާ ކަޕޫރް ޕްރޮޑިއުސްކޮށް، އޭނަގެ ފިރިމީހާ ކަރަން ބޫލާނޫ ޑައިރެކްޓްކުރި "ތޭންކް ޔޫ ފޯ ކަމިން" އާއި ސަލްމާން ޚާންގެ "ކިސީ ކާ ބާއީ، ކިސީ ކީ ޖާން" ހިމެނެ އެވެ.
ސަނާ މިހާރު އަންނަނީ "ސަބް ފަސްޓް ކްލާސް" ކިޔާ ފިލްމެއް ކުޅެމުންނެވެ.