ރައީސް ޑރ. މުހައްމަދު މުއިއްޒު، އިންޑިއާގެ ރައީސް ޑްރޫޕަތީ މޫރްމޫއާ މިއަދު ބައްދަލު ކުރައްވައިފި އެވެ.
މި ބައްދަލުކުރެއްވުމުގައި ރާއްޖެ އާއި އިންޑިއާގެ ގުޅުން އިތުރަށް ބަދަހިކުރުމާ ގުޅޭގޮތުން ވަނީ މަޝްވަރާކުރައްވާފަ އެވެ. ރާއްޖެ އަކީ އިންޑިއާގެ ގާތް އަދި އިންޑިއާ އިން ގެންގުޅޭ "ނެއިބަހުޑް ޕޮލިސީ"ގެ މުހިއްމު ބައިވެރިއެއް ކަމަށް އިންޑިއާގެ ރައީސް ވަނީ ވިދާޅުވެފަ އެވެ.
މި ބައްދަލުކުރެއްވުމަށް ފަހު އިންޑިއާގެ ރައީސް ވަނީ ރައީސް މުއިއްޒުގެ ދެކަނބަލުންގެ ޝަރަފުގައި ފުރަމާނަ ޖާފަތެއް ދެއްވާފަ އެވެ.
ރައީސް އިންޑިއާ އަށް ކުރައްވާ ދަތުރުފުޅަކީ އެގައުމުގެ ރައީސްގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދާއި، މަތީ ފަންތީގެ ވަފުދެއް ބައިވެރިވެވަޑައިގަންނަވަ އެވެ.
ރައީސް މުއިއްޒު އިންޑިއާ އަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ އެގައުމުގެ ބޮޑުވަޒީރު ނަރެންދްރަ މޯދީއާއެކު މަޝްވަރާ ބައްދަލުވުމެއް ބާއްވައި އެގައުމާއެކު ތަފާތު އެކި ދާއިރާތަކުން މުހިއްމު ގިނަ އެއްބަސްވުންތަކެއް ސޮއިކޮށްފަ އެވެ.
މޯދީއާއެކު ބޭއްވި ބައްދަލުކުރެއްވުމުގައި ވަނީ އިންޑިއާގެ ކޮންސިއުލޭޓެއް އައްޑޫ ސިޓީގައި އަދި ބެންގަލޫރުގައި ރާއްޖޭގެ ކޮންސިއުލޭޓެއް ގާއިމުކުރުމާ ގުޅޭގޮތުން ވެސް މަޝްވަރާކުރައްވާފަ އެވެ.
އިންޑިއާއަށް ރައީސް ކުރައްވާ މި ފުރަމާނަ ދަތުރުފުޅުގައި އިންޑިއާގެ ވެރިރަށް ނިއުދިއްލީގެ އިތުރުން، މުމްބާއީއަށާއި ބެންގަލޫރަށްވެސް ޒިޔާރަތްކުރެއްވުމަށް ވަނީ ހަމަޖެހިފަ އެވެ.