ރާއްޖޭގެ ކާމިޔާބު ފިލްމު ސްޓޫޑިއޯ، ޑާކް ރެއިން އެންޓަޓައިންމަންޓްގެ އާ ފިލްމު "ބިބީ" ރޭ އޮލިމްޕަހުގައި ޕްރީމިއާކޮށްފި އެވެ.
ކުލަގަދަ ރެޑް ކާޕެޓް އިވެންޓަކާ އެކީ ފިލްމު ޕްރީމިއާކުރި އިރު، މިއީ އަލަށް ޑައިރެކްޝަނަށް ނުކުތް ޝަހުދާ މަހުމޫދު ލިޔެ، ޑައިރެކްޓްކުރި ފުރަތަމަ ފީޗާ ފިލްމެވެ. މި ފިލްމަކީ ޑާކް ރެއިންގެ ފުރަތަމަ ހޮރޯ-ކޮމެޑީ އެވެ.
"ބިބީ" ގެ ލީޑް ތަރިންނަކީ ޝަހުދާގެ ފިރިމީހާ އަދި މިހާރު ރާއްޖޭގެ އެންމެ ބިޒީ އެކްޓަރުގެ ގޮތުގައި ފާހަގަކޮށްލެވޭ ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ. ފިލްމުގެ އިތުރު ކާސްޓުންގެ ތެރޭގައި ޝީލާ ނަޖީބު، އަހުމަދު ސައީދު، އަބްދުﷲ ޝާފިއު (ފުބޫ)، އަހުމަދު ޝާކިރު (ޝާއްކޮ އައްމަޑޭ)، މަލީހާ ވަހީދު، ޝުހާ، އާދަމް ރިޒްވީ، ސާމީ، އަމަން ހާޒިފު އަދި މަރިޔަމް ހަލީމް ހިމެނެ އެވެ.
މީގެ ވަރަށް ހާއްސަ ފެނިލުމަކުން ކުރީގެ މަޝްހޫރު އެކްޓަރު އިސްމާއީލް ވަޖީހު ވެސް ހިމެނެ އެވެ.
"ބިބީ" އަކީ ޑާކް ރެއިނުން މި އަހަރު ގެނެސްދިން ދެވަނަ ފިލްމެވެ. އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ ޝަރަފާ އެކީ މާޗްގައި ގެނެސްދިން ރިވެންޖް އެކްޝަން ތުރިލާ "ފުރޭތަ" އެވެ.
"ބިބީ" އަކީ މި އަހަރު އޮލިމްހަށް ގެނައި 10 ވަނަ ފިލްމެވެ. މި ފިލްމުގެ ޝޯތައް މި މަހުގެ 28 އާ ހަމައަށް ކުރިއަށް ދާނެ އެވެ.