ރާއްޖޭގައި ހިމާޔަތްކޮށްފައިވާ ދިރުންތަކާއި އެތަކެތި އުޅޭ މާހައުލުތަށް ނޭދެވޭ އަސަރު ކުރާ ގިނަ ކަންތައްތައް ތަކުރާރުކޮށް ފެންނަ މިންވަރު އަހަރަކަށް ވުރެ އަހަރެއް އިތުރުވަމުންދާ ކަމަށް އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނެފި އެވެ.
އެތަނުން ނެރުނު ބަޔާނެއްގައި ވަނީ ހިމާޔަތްކޮށްފައިވާއި ދިރުންތައް ހިފާ ގެންގުޅުމާއި އެތަކެތި މަރުމާ ކެއުމުގެ އިތުރުން ތަކެތީގެ ބައިތަކުގެ ވިޔަފާރި ކުރުމަކީ ވެސް މަނާކަމެއްކަން ހަނދާންކޮށް ދީފަ އެވެ.
އީޕީއޭ އިން ބުނީ "ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނު"ގެ ދަށުން ބާރުދޭ "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވައިދު"ން ވަނީ ރާއްޖޭގެ މާހައުލުން ފެންނަ މުހިއްމު ދިރުންތަކެއް ރައްކާތެރިކޮށް، ގާނޫނީ ގޮތުން ހިމާޔަތްދީފައި ކަމަށެވެ. އެގޮތުން ހިމާޔަތްކޮށްފައިވާ ބާވަތްތަކުގެ ތެރޭގައި ފަސް ބާވަތެއްގެ ވެލާ ކަހަނބާއި އެއް ބާވަތުގެ ކަންޒު ކަހަނބާއި 207 ބާވަތެއްގެ ދޫންޏާއި ރާއްޖޭގެ ސަރަހައްދުން ފެންނަ ހުރިހާ ބާވަތެއްގެ މަޑީގެ އިތުރުން ފެހުރިހި ހިމެނެ އެވެ.
އީޕީއޭ އިން ބުނީ މި ދިރުންތަކަކީ ރާއްޖޭގެ ގުދުރަތީ މާހައުލަށް މުހިއްމު ފައިދާތަކެއް ފޯރުކޮށްދޭ ދިރުންތަކެއް ކަމަށާއި މިއީ ދިވެހިންގެ އުޅުމާއި ސަގާފަތާއި އިގުތިސީދާ ވަރަށް ވެސް ބޮޑަށް ގުޅި ލާމެހިފައިވާ މުހިއްމު ދިރުންތަކެއް ކަމަށެވެ.
އަދި ހިމާޔަތްކޮށްފައިވާ ދިރުންތަކަކީ ޓޫރިޒަމަށް ވެސް މުހިންމު ދައުރެއް އަދާކުރާ ދިރުންތަކެއް ކަމަށާއި ނޭޗާ ޓުއަރިޒަމްގެ ފަހަތުގައިވާ އެއް ސަބަބު ވެސް އެފަދަ ދިރުންތައް ކަމަށް ބުންޏެވެ.
ނަމަވެސް ހިމާޔަތްކޮށްފައިވާ ދިރުންތަކަށާއި އެތަކެތީގެ މާހައުލަށް ގެއްލުން ލިބޭ ކަންކަން ތަކުރާރުވެ، އިތުރުވަމުންދާތީ ކަންބޮޑުވުން ފާޅުކޮށް އީޕީއޭ އިން ބުނީ އެފަދަ ތަކެއްޗަށް ގެއްލުން ލިބޭ ގޮތަށް އަމަލު ކުރާ ނަމަ ފިޔަވަޅު އަޅާނެ ކަމަށެވެ.