ބޮލީވުޑްގެ ޑައިރެކްޓަރު ސަންޖޭ ލީލާ ބަންސާލީގެ އާ ފިލްމު "ލަވް އެންޑް ވޯ" އަކީ ކުރީގެ ވަރަށް މަޝްހޫރު ފިލްމެއް ކަމަށްވާ "ސަންގަމް" ގެ ރިމޭކެއް ކަމަށް ބުނާ ވާހަކަ އޭނަ ދޮގުކޮށްފި އެވެ.
ދާދި ފަހުން ލޯންޗްކުރި "ހޮލީވުޑް ރިޕޯޓާ، އިންޑިއާ" އަށް ދިން އިންޓަވިއުއެއްގައި ކުޅަދާނަ ޑައިރެކްޓަރު ބުނީ ރަންބީރް ކަޕޫރާއި އާލިއާ ބަޓްގެ އިތުރުން ވިކީ ކޯޝަލާ އެކީ ހަދަން ނިންމާފައިވާ "ލަވް އެންޑް ވޯ" އާއި 1964 ގެ "ސަންގަމް" އާ އެއްވެސް ގުޅުމެއް ނެތް ކަމަށެވެ.
"އަހަރެން ގަބޫލެއް ވެސް ނުކުރަން ޝޯލޭ އާއި މަދާ އިންޑިއާ ފަދަ ފިލްމުތައް އަލުން ހަދަން ޖެހޭ ކަމަކަށް. ހަމައެގޮތަށް ސަންގަމް އަކީ ވެސް އަލުން ހަދަން ޖެހޭ ވަރަށް ވުރެ ފުރިހަމަ ފިލްމެއް،" ބަންސާލީ ބުންޏެވެ. "އެހެންވެ ކީއްވެ އަހަރެން އޭގެ ރިމޭކެއް ހަދަންވީ؟"
"ސަންގަމް" އަކީ ވަރަށް އަސަރު ގަދަ ލޯބީގެ ފިލްމެކެވެ. އެ ފިލްމަކީ ރަންބީރްގެ ކާފަ، ރާޖް ކަޕޫރް ކުޅެ، ޑައިރެކްޓްކުރި ފިލްމެކެވެ. ތިނެސްކަން ލޯބީގެ ވާހަކައެއް ކިޔައިދިން ފިލްމުގެ ކާސްޓްގައި ވިޖަޔަންތިމާލާ އާއި ރަޖެންދުރަ ކުމާރު ވެސް ހިމެނެ އެވެ.
ބަންސާލީ ބުނީ "ލަވް އެންޑް ވޯ" އަކީ އޭނަ މިހާތަނަށް ހެދި ހުރިހާ ފިލްމުތަކާ ވަރަށް ތަފާތު ފިލްމަކަށް ވާނެ ކަމަށެވެ. އެހެންވެ މިއީ ވަރަށް ހާއްސަ ފިލްމެއް ކަމަށް ވެސް ބުންޏެވެ.
"މީގެ ސެޓިން ވަރަށް ތަފާތު ވާނެ. މީގެ ކުރިން އަހަރެން ގެނެސްދިން ގިނަ ފިލްމުތައް ބޮޑަށް ބިނާވެފައި ހުރީ ޕީރިއަޑް ސެޓިންތަކަށް. އެކަމަކު ލަވް އެންޑް ވޯ އަކީ ކޮންޓެމްޕޮރަރީ ސެޓިންއަކަށް ބިނާވާނެ އެއްޗެއް. މީގެ މިއުޒިކް ވެސް ވަރަށް ތަފާތު ވާނެ،" އިންޑިއާގެ އެންމެ ކުޅަދާނަ ޑައިރެކްޓަރުންގެ ތެރޭގައި ހިމެނޭ ބަންސާލީ ބުންޏެވެ. "އެހެންވެ ލަވް އެންޑް ވޯ އަކީ ފަސޭހަ ފިލްމަކަށް ވެސް ނުވާނެ. މި ސަބަބާ ހުރެ މި ޕްރޮޖެކްޓާ އަހަރެން ކުރިމަތިލަނީ އަމިއްލަ ޗެލެންޖެއްގެ ގޮތުގައި."
"ލަވް އެންޑް ވޯ" އަންނަ އަހަރުގެ ޑިސެމްބަރުގައި ގެނެސްދޭން ކުރިން ނިންމި ނަމަވެސް މިހާރު ފިލްމު ބެލުންތެރިންނަށް ގެނެސްދޭން ތާވަލުކޮށްފައި ވަނީ މާޗް 26، 2026 ގަ އެވެ. ފިލްމުގެ ޝޫޓިން ފެށުމުގެ ތައްޔާރީތައް އަންނަނީވަމުންނެވެ.
"ހަމް ދިލް ދޭ ޗުކޭ ސަނަމް" އާއި "ދޭވްދާސް" އާއި "ރާމް-ލީލާ" އާއި "ބަޖިރާއޯ މަސްތާނީ" ގެ އިތުރުން "ޕަދުމާވަތު" ފަދަ ކާމިޔާބު ފިލްމުތައް ގެނެސްދިން ބަންސާލީގެ އެންމެ ފަހުގެ ފިލްމަކީ އާލިއާ އަށް މިދިޔަ އަހަރު މޮޅު ބަތަލާގެ ނެޝަނަލް އެވޯޑް ލިބުނު 2022 ގެ "ގަންގޫބާއީ ކަތިއަވާޅީ" އެވެ.
"ލަވް އެންޑް ވޯ" އަށް ތައްޔާރީތައް ވަމުން އަންނަ އިރު، މި އަހަރު މެއި މަހު ބަންސާލީ ވަނީ ނެޓްފްލިކްސް އަށް ވަރަށް މަގުބޫކު ވެބް ސީރީޒެއް ވެސް ގެނެސްދީފަ އެވެ. އެއީ "ހީރާމަންޑީ: ދަ ޑައިމަންޑް ބާޒާރު" އެވެ. މީގެ ދެވަނަ ސީޒަނެއް ހަދަން ވެސް އޮތީ ނިންމައިފަ އެވެ.