ކުޑަކުދިންނަށް ނަމާދު ކުރަން ދަސްކޮށްދޭން އަނެއްކާ ވެސް ފުވައްމުލަކުގައި ޕްރޮގްރާމެއް ހިންގަން ނިންމައި، ބައިވެރިވާން ހުޅުވާލައިފި އެވެ.
ފުވައްމުލައް ސިޓީ ކައުންސިލުން ބުނީ އަންނަ މަހުގެ 1 ގައި ފަށަން ހަމަޖެހިފައިވާ މި ޕްރޮގްރާމް ހާއްސަކޮށްފައި ވަނީ މި މަހުގެ 30 ގެ ނިޔަލަށް 7 އަހަރު ފުރި، 12 އަހަރު ނުފުރޭ ކުދިންނަށް ކަމަށެވެ. އަދި ދެ ޖިންސްގެ ކުދިންނަށް ވެސް ނަމާދު ޕްރޮގްރާމްގައި ބައިވެރިވެވޭނެ އެވެ.
އެހެންވެ 40 ދުވަހަށް ކުރިއަށް ގެންދަން ހަމަޖެހިފައިވާ ޕްރޮގްރާމްގައި ކުދިން ބައިވެރި ކުރުމުގެ ފުރުސަތު މި މަހުގެ 17 އާ ހަމައަށް ވަނީ ހުޅުވާލައިފަ އެވެ.
ފުވައްމުލަކު ކައުންސިލުން ބުނީ ނަމާދު ޕްރޮގްރާމްގެ މަގުސަދަކީ އެ ސިޓީގެ ކޮންމެ ރައްޔިތަކީ ފަސް ނަމާދު ގާއިމުކުރާ ރައްޔިތަކަށް ހެދުމުގެ މަސަދުގައި، ކުޑަކުދިންނަށް ނަމާދު ކުރަން ދަސްކޮށް ދިނުން ކަމަށެވެ. މި ޕްރޮގްރާމް ނިމޭ އިރު، ވުޟޫކުރުމާއި ނަމާދުގައި ކިޔާތަކެތި ހިތުންދަސްވުމާއި ޟުޙާ ސޫރަތުން ތިރި ހިތުން ދަސްވުމާއި ޢަޤީދާއާ ގުޅޭ ބައެއް މަޢުލޫމާތުތަކަށް ވެސް ކުދން އަހުލުވެރިވެގެން ދާނެ އެވެ.
މިދިޔަ އަހަރު ފުވައްމުލަކުގައި ކުރިއަށް ގެންދިޔަ ނަމާދު ޕްރޮގްރާމްގައި 150 ކުއްޖަކު ބައިވެރިވި އެވެ. އެ ފަހަރު ޕްރޮގްރާމް ހާއްސަކުރީ އުމުރުން 9-13 އަހަރާ ދެމެދުގެ ކުދިންނަށެވެ.