އިޒްރޭލުން މިހާރު ލުބްނާން ސުންނާފަތިކޮށްލަން ފޫގަޅާފައިވާ އިރު، އެ ގައުމަށް ބައިނަލްއަގުވާމީ ދުނިޔޭގެ އެއްވެސް އަޅާލުމެއް ނުލިބޭ ކަމަށް ވިދާޅުވެ ކުރީގެ ބޮޑުވަޒީރު ފުއާދު ސިނިއޯރާ ކަންބޮޑުވުން ފާޅުކުރައްވައިފަ އެވެ.
އިޒްރޭލުން އެންމެ ފަހުން ލުބުނާނާ ދެކޮޅަށް 2006 ގައި ހަނގުރާމަކުރި އިރު، ވެރިކަމުގައި ހުންނެވި ވެރިޔާ ބީބީސީ އަށް ދެއްވި އިންޓަވިއުއެއްގައި ވިދާޅުވީ ލުބްނާނުގެ މިހާރުގެ ހާލަތާ މެދު ވަރަށް ކަންބޮޑުވެވަޑައިގަންނަވާ ކަމަށެވެ. އޭނަ ވިދާޅުވީ އެ ގައުމު މިހާރު އޮތީ ބައިނަލްއަގުވާމި އެހީތެރިކަމާއި އަޅާލުން ބޭނުންވާ ފަދަ ހާލަތެއްގައި ކަމަށެވެ.
ނަމަވެސް ގައުމުގެ އަމާންކަމާއި ސުލްހަ މަސަލަސްކަސް ގެއްލި އާންމު ރައްޔިތުން ބިރުވެރިކަމެއްގެ ތެރެއަށް ވެއްޓިފައިވާ އިރު، ލުބްނާނަށް ސުލްހަ އާއި އަމާންކަން ގެނެސްދޭން ބައިނަލްއަގުވާމީ ދުނިޔެ ނުކުޅެދިފައިވާ ކަމަށް ސިނިއޯރާ ވިދާޅުވި އެވެ.
"ވަރަށް ވެސް ބިރުވެރި ވެއްޓެއް މިހާރު މިއޮތީ. މިކަމުން އަރައިގަތުމަށް އަރަބި ގައުމުތަކުގެ އިތުރަަށް ބައިނަލްއަގުވާމީ އެހީތެރިކަން ލުންބާނަށް އިންތިހާ އަށް ބޭނުން." އޭނަ ވިދާޅުވި އެވެ.
ނަމަވެސް ހާލަތު އެއް ދުވަހުން އަނެއް ދުވަހަށް ގޯސްވަމުންދާ އިރު، މިކަމަށް މުޅި ދުނިޔެ ވެސް އޮތީ ލޯ މަރާލައިގެން ކަމަށް ސިނިއޯރާ ވިދާޅުވި އެވެ.
އިޒްރޭލުން ހިޒްބްﷲ ޖަމާއަތަށް ނައްތައިލަން ކަމަށް ބުނެ ދެމުންދާ ހަމަލާތައް ދުވަހުން ދުވަހަށް ވަރުގަދަވެ، އިތުރުވެ، އެތައް ބައެއްގެ ފުރާނަ ވެސް ފާއިތުވި ދެ ހަފުތާއެއްހާ ދުވަހުގެ ތެރޭގައި ވަނީ ގެއްލިގެން ގޮސްފަ އެވެ. އިޒްރޭލުން މިދިޔަ މަހުގެ ފަހުކޮޅު ވައިގެ ހަމަލާއެއްގައި ހިޒްބުﷲ ގެ ލީޑަރު ހަސަން ނަސްރުﷲ އާއި އެ ޖަމާއަތުގެ އިތުރު ލީޑަރުންތަކެއް އަވަހާރަކޮށްލާފައިވެ އެވެ.
އިޒްރޭލުން ލުބްނާން ސުންނާފަތި ކުރަމުންދާ އިރު، ޔަހޫދީ ދައުލަތުން ފަލަސްތީނާ ދެކޮޅަށް ހިންގަމުންދާ ގަތުލުއާންމަށް އިއްޔެ ވަނި އަހަރެއްވެފަ އެވެ.