މާދަމާ އިޓަލީގައި ފަށާ ޓޫރިޒަމް ފެއާއެއްގައި ރާއްޖެ ޕްރޮމޯޓް ކުރަން ތައްޔާރުވެއްޖެ އެވެ.
އެމްއެމްޕީއާރްސީން ބުނީ މިއީ މާދަމާ އިން ފެށިގެން މި މަހުގެ 11 އާ ހަމައަށް ކުރިއަށް ގެންދާ "ޓީޓީޖީ ޓްރެވެލް އެކްސްޕީރިއަސް 2024" ފެއާ ކަމަށެވެ.
މި ފެއާގައި ރާއްޖޭގެ ޓޫރިޒަމް ސިނާއަތުގެ އެކި ފަރާތްތަކުން ބައިވެރިވެ އެވެ. އޭގެ ތެރޭގައި ރާއްޖޭގެ ދެކުނުން އައްޑޫގައި ހިންގަމުން އަންނަ ކެނަރީފް ރިސޯޓުން ވެސް ފެއާގައި ބައިވެރިވެ އެވެ. އެ ރިސޯޓަކީ އަންނަ މަހުގެ 5-11 އަށް ބާއްވަން ހަމަޖެހިފައިވާ 15 ވަނަ "ވޯލްޑް ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕް" ވެސް ހޯސްޓްކުރާ ރިސޯޓެވެ.
އިޓަލީގެ ފެއާއެއްގެ ރާއްޖޭގެ ޓޫރިޒަމް ޕްރޮމޯޓްކުރާ އިރު، އެ ގައުމު މިހާރު ހިމެނެނީ ރާއްޖެ އަށް އެންމެ ގިނަ ޓޫރިސްޓިން އަންނަ 10 ގައުމުގެ ލިސްޓްގެ 5 ވަނައިގަ އެވެ. މި މަހުގެ 6 އާ ހަމައަށް އިޓަލީން ރާއްޖެ އަށް 107،799 ޓޫރިސްޓުން ޒިޔާރަތްކޮށްފައިވެ އެވެ.
އިޓަލީ އަކީ އަބަދު ވެސް ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމުގެ ތެރޭގައި ހިމެނޭ ގައުމެކެވެ.
މި މަހުގެ 6 އާ ހަމައަށް ރާއްޖެ އަށް ޖުމްލަ 1،522،621 ޓޫރިސްޓުން އައިސްފައިވެ އެވެ. އަދި ގަދަ ތިނެއްގައި ހިމެނޭ ގައުމުތަކީ ޗައިނާ (227،978 ޓޫރިސްޓުން) އާއި ރަޝިއާ (166،172 ޓޫރިސްޓުން) އަދި އިނގިރޭސިވިލާތް (128،262 ޓޫރިސްޓުން) އެވެ.
ރާއްޖޭގެ މި އަހަރުގެ ޓާގެޓަކީ 2 މިލިއަން ޓޫރިސްޓުން ގެނައުމެވެ.