ރޯދަ މަސް ފެށެން ދެތިން ދުވަހަށް ވެފައިވާއިރު އައްޑޫ ސިޓީގެ ގިނަ ރައްޔިތުން މިވަގުތު އަވަސް އަރުވާލާފައި ކުރަމުން ގެންދަނީ ގޭގެ ގޯތީގެ ތެރޭގައި ހުރި ކުނިތައް އުކާލައި ރޯދަޢަށް ގެ ސާފުކުރުމުގެ މަސައްކަތެވެ. ނުވަތަ ރޯދަ މަސް ފެށެންވާއިރަށް ގޯތިތެރޭގައިވާ ވެލިލާ ހުރިހާތަނެއްގައި ކުރިން ހުންނަ ބައުވެލި ނަގައި އައުވެލި ލުމުގެ މަސައްކަތެވެ.
ގެތަކުން އުކާލަން ޖެހޭ ކުނި އުކާލުމުގައި ގިނަ ބަޔަކު ޕިކަޕްތައް ކުއްޔަށް ހިފައިގެން ސީދާ ކުނިކޮށްޓަށް ކުނި އުކާލަމުން ގެންދާއިރު، ބައެއް ފަރާތްތަކުން ރަށުގެ ފުއްޓަރު ފަރާތަށާއި ވަލުތެރޭގެ ސަރަހައްދުތަކަށް ކުނި އުކާލުން މިދުވަސްކޮޅު އިތުރުވެފައިވާ ކަން ފާހަގަކޮށްލެވެއެވެ.
އައްޑޫ ސިޓީގެ ގުޅިފައިވާ ރަށްތަކުގެ ގެ ތަކުން މީގެ ކުރިން ކުނިކޮށްޓަށް ކުނި އުކާލަ ދިނުމުގެ ޚިދުމަތް އަމިއްލަ ކުންފުންޏަކުން މީގެ ކުރިން ކުރަމުން ދިޔަ އިރު އެއްވެސް ދައްޗަކާއި ކުރިމަތި ނުވާ ކަމަށް ގިނަ ރައްޔިތުން ބުނެއެވެ.
" މީގެ ކުރިން ނަމަ ސަދަން މޯލްޑިވްސް މީހުން އަންނާނެ ހަފްތާއަކު 1 ދުވަހު. ދެން އެއަށް ސެޓް ވެވޭ. މިހާރު އަދި އަލުން ރަޖިސްޓާ ކުރަން މިޖެހެނީ. ދެން މި ޕްރޮސެސް ނިމިގެން ކުނި އުކާނުލެވި ރޯދަ މަސް ފެށޭނީ. އެހެންވެ ގިނަ ބަޔަކު އެތަން މިތަނަށް ކުނި އުކާލަމުން އެދަނީ "، ސ.ހިތަދޫގެ ވިޔަފާރިވެރިއަކު ބުންޏެވެ.
ކުނިކޮށްޓަށް ކުނި އުކާލުމަށް އަމިއްލަ ފަރާތްތަކުން ވަންނަ އިރު 50 ރުފިޔާ އާއި 100 ރުފިޔާ އާއި ދެމެދުގެ ފީއެއް ކޮންމެ ކުނި ލޮރީއަކަށް ނެގި ނަމަވެސް ހިތަދޫ އިން ކުނިި ކޮށްޓާ ހަމައަށް ޕިކަޕްތަކުން ދަތުރުކޮށްދެނީ 150 ރުފިޔާ އާއި 200 ރުފިޔާ އާއި ދެމެދުގެ އަގުތަކެއްގައެވެ. އެހެން ކަމުން ހިތަދޫގެ ގެއަކުން ކުނި އުކާލާ ނަމަ ގާތް ގަނޑަކަށް 300 ރުފިޔާ ވަރު ޚަރަދު ކުރަން ޖެހެއެވެ.
މަރަދޫ އިން ކުނިކޮށްޓަށް 100 ރުފިޔާ އަށް ޕިކަޕް ތަކުން ދަތުރެއް ކޮށްދޭ އިރު ފޭދޫ އިން ކުނިކޮށްޓަށް ދަތުރެއް ކޮށްދޭ އަގު އުޅެނީ 150 ރުފިޔާ އާއި 100 ރުފިޔާ އާއި ދެމެދުގައެވެ.
ހިތަދޫގެ ފުއްޓަރު ފަރާތުގެ ގިނަ ސަރަހައްދުތަކަށް މި ދުވަސްކޮޅު އާދަޔާ ޚިލާފަށް ކުނި އަޅަމުން ގެންދާއިރު އެކަން ހުއްޓުވުމަށް އެއްވެސް ފަރާތަކުން ފިޔަވަޅެއް އަޅާފައި ނުވާކަން ފާހަގަކޮށްލެވެއެވެ.
ސިޓީ ކައުންސިލަށް ވަރަށް ފަހުން ޕިކަޕްތަކެއް ގަނެފައިވާއިރު، ރޯދަ މަހަށް ޚާއްސަކޮށް އައްޑޫ ސިޓީގެ ގޭބިސީތަކުން އުކާލާ ކުނި ވަކި އިންތިޒާމެއްގެ ދަށުން އުކާލަ ދިނުމުގެ ޚިދުމަތް ނުދެވެންވީ ސަބަބެއް އޮތް ކަމަކަށް ނުފެނެއެވެ.
ނަން ނޯޓް ކުރުމުގެ ފުރުސަތު ހުޅުވާޅުމަށް ފަހު ، ކޮންމެ އަވަށެއްގެ ކައުންސިލަރެއްގެ ބެލުމުގެ ދަށުން އެ އަވަށުގެ ގެތަކުން ކުނި އުކާލުމުގެ މަސައްކަތް ކައުންސިލްގެ އެހީތެރިކަމާއި އެކު ކުރެވިއްޖެ ނަމަ ރަށުގެ އެތަން މިތަނަށް ކުނި އުކާލަމުންދާ ދިއުން ހުއްޓުވިގެން ދާނެ ކަން ޔަޤީނެވެ.
ކައުންސިލަށް ގަނެފައިވާ ޕިކަޕްތަކުގެ ސައިޒު ކުޑަ ވުމުގެ ސަބަބުން ކޮންމެ ފަހަރަކު ސީދާ ކުނިކޮށްޓަށް ކުނި އުކާލުމުގެ ބަދަލުގައި ކޮންމެ އަވަށެއްގެ ގެތަކުން އުކާލަން ބޭނުންވާ ކުނި އެއްތަނަކަށް ގެންދިއުމަށް ފަހު، އެމްއާރްޑީސީގެ އެހީތެރިކަމާއި އެކު ބޮޑު ލޮރީއެއްގައި އުކާލެވިދާނެއެވެ.
ހިލޭ ސާބަހަށް މިކަން ކުރުމަށް ކައުންސިލަށް ދަތިފުޅުވާނަމަ 50 ރުފިޔާގެ ފީއެއް ނަގައިގެން ވެސް މިކަން ކުރެވިދާނެއެވެ.
މިފަދަ ގޮތަކަށް ރޯދައަށް ކުނި އުކާލުމުގައި ކައުންސިލްގެ ފަރާތުން ރައްޔިތުންނަށް އެހީތެރިކަން ފޯރުކޮށްދިނުމުގައި ހަމަގައިމުވެސް ޤާނޫނީ ގޮތުން އެއްވެސް ހުރަހެއް ނެތެވެ. ކައުންސިލްތަކަށް ބޭފުޅުން އިންތިޚާބްކޮށްފައި ވަނީ ވެސް ރައްޔިތުންނަށް ޚިދުމަތް ދިނުމަށްޓަކައެވެ.
އެހެންކަމުން އެބޭފުޅުންގެ ފަރާތުން، ރޯދައަށް ކުނި އުކާލުމުގައި ރައްޔިތުންނަށް އެހީތެރިކަން ފޯރުކޮށް ދެވިއްޖެނަމަ އެކަން ވެގެންދާނީ ރައްޔިތުންނަށް ލިބޭނެ ވަރަށް ބޮޑު އުފަލަކަށް ކަން ޔަޤީނެވެ. މިއީ އަޅުގަނޑުގެ ޚިޔާލެވެ.