ބޮލީވުޑްގެ ކުޅަދާނަ ޑައިރެކްޓަރު ރާޖްކުމާރު ހިރާނީ ހަދަން ތައްޔާރުވަމުން އަންނަ އަލަތު ވެބް ސީރީޒް "ޕްރިތަމް ޕެޑްރޯ" ގައި އެކްޓަރު ވިކްރާންތު މަސީ އެއްބަސްވި ރޯލު މިހާރު ކުޅެން ހަމަޖެހިފައި ވަނީ ހިރާނީގެ ދަރިފުޅު ވީރް ހިރާނީ ކަމަށް ރިޕޯޓްތައް ބުނެފި އެވެ.
ފިލްމުފެއާ އިން ބުނީ މި ސީރީޒްގެ ކާސްޓަށް މިފަދަ ބަދަލެއް ގެންނަން ނިންމީ މިދިޔަ އަހަރުގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ "ޓުވެލްތު ފެއިލް" ގެ އެކްޓަރަށް އެހެން ޕްރޮޖެކްޓަތަކަށް ދޭން ޖެހިފައިވާ ވަގުތާ ހެދި ހިރާނީގެ ސީރީޒް އަށް ވަގުތު ދެވެން ނެތުމުން ކަމަށެވެ.
ސައިަބްކްރައިމް ޑްރާމާއެއްގެ ގޮތުގައި ހަދަން ނިންމާފައިވާ "ޕްރިތަމް ޕެޑްރޯ" ގައި ވިކްރާންތު ކުޅެން އޮތީ ޕްރިތަމްގެ ރޯލެވެ. ޕެޑްރޯގެ ރޯލު ކުޅެން ހަމަޖެހިފައި ވަނީ އަރުޝަދު ވަރްސީ އެވެ. އޭނަ ކުރިން ހިރާނީގެ "މުންނާބާއީ އެމްބީބީސީއެސް" އާއި "ލަގޭ ރަހޯ މުންނާބާއީ" ގައި ވެސް މަސައްކަތް ކުރި އެވެ.
"ޕްރިތަމް ޕެޑްރޯ" ގައި ދައްކުވައި ދޭނީ ކުށުގެ ވެށި ހަމައަކަށް ތަފާތު ދެ ވިސްނުމެއްގެ ދެ ފުލުހުން ކުރާ މަސައްކަތެވެ. އެގޮތުން އަރުޝަދު ކެރެކްޓާ އަކީ އެންމެ އިހުގައި ވެސް ފުލުހުން މަސައްކަތްކުރާ ވައްޓަފާޅި އަށް މަސައްކަތްކުރާ ފުލުހެއްގެ ރޯލެވެ. ޕްރިތަމްގެ ކެރެކްޓާ އަކީ ޒަމާނީ ޓެކްނޮލޮޖީގެ އެހީގައި ކުށް މަދުކުރަން މަސައްކަތްކުރާ ފުލުހެއްގެ ރޯލެވެ.
"ޕްރިތަމް ޕެޑްރޯ" އިން ވީރް ރަސްމީކޮށް އެކްޓިން އަށް ނުކުންނަ އިރު، އޭނަ ކުރިން ސްޓޭޖް ތަމްސީލުތަކެއް ކުޅެފައިވެ އެވެ. އަދި "ރިޓާން ގިފްޓް" ގެ ނަމުގައި ކުޑަކުދިންގެ ފިލްމެއް ވެސް ޑައިރެކްޓްކޮށްފައިވެ އެވެ.
ވީރްގެ ބައްޕަ ހިރާނީގެ އެންމެ ފަހުގެ ފިލްމަކީ ޝާހްރުކް ޚާންގެ މިދިޔަ އަހަރުގެ "ޑަންކީ" އެވެ. އޭނަ ގެނެސްދިން ފިލްމުތަކުގެ ތެރޭގައި "3 އިޑިއަޓްސް"، "ޕީކޭ" އަދި "ސަންޖޫ" ވެސް ހިމެނެ އެވެ.