އެންޓި-ކޮރަޕްޝަން ކޮމިޝަނާއި އިންޑިއާގެ ސެންޓްރަލް ބިއުރޯ އޮފް އިންވެޓިގޭޝަން (ސީބީއައި) އާ ދެމެދު ފަހުމުނާމާއެއްގައި ސޮއިކޮށްފި އެވެ.
މި ފަހުމުނާމާގައި އޭސީސީގެ ފަރާތުން ސޮއިކުރެއްވީ ކޮމިޝަނުގެ ރައީސް އަލްއުސްތާޛު އާދަމް ޝާމިލް އެވެ. އަދި ސީބީއައިގެ ފަރާތުން ސޮއިކުރެއްވީ ސީ.ބީ.އައިގެ ޑިރެކްޓަރ، ޕްރަވީން ސޫދެވެ.
މި ފަހުމުނާމާގެ ދަށުން ކުރިޔަށް ގެންދާ މައިގަނޑު ކަންތައްތަކުގެ ތެރޭގައި ކޮރަޕްޝަން ވިޔަނުދިނުމަށްޓަކައި (ޕްރިވެންޝަން) ބޭނުންވާ މަޢުލޫމާތު ދެ މުއައްސަސާގެ މެދުގައި ބަދަލުކުރުމާއި ކޮރަޕްޝަނާއި ދެކޮޅަށް މަސައްކަތްކުރުމުގައި "ބެސްޓް ޕްރެކްޓިސް"ތަކުގެ މަޢުލޫމާތު ބަދަލުކުރުމާއި، ދެމުއައްސަސާ ގުޅިގެން ދިރާސާކުރުމާއި ތަޢުލީމު، ތަމްރީނު އަދި ދިރާސާ ހިމެނޭގޮތަށް ކޮރަޕްޝަން ހުއްޓުވުމަށް ފުޅާ ދާއިރާއެއްގައި މަސައްކަތްކުރުމަށް އެކުގައި މަޝްރޫޢުތަކާއި ޙަރަކާތްތައް ކުރިޔަށްގެންދިޔުން ހިމެނެ އެވެ.
އަދި ކޮރަޕްޝަން ވިޔަނުދިނުމާއި (ޕްރިވެންޝަން) އެކަމާ ދެކޮޅަށް ހޭލުންތެރިކުރުވުމުގައި އެއް މުއައްސަސާ އަނެއް މުއައްސަސާއަށް އެހީތެރިވެ، މަޢުލޫމާތާއި، ހުނަރާއި، ތަޖުރިބާއާއި އަދި އެންމެ ރަނގަޅު އުސޫލުތައް ހިއްސާކުރުމާއި ކޮރަޕްޝަނުގެ ކުށް ތަޙުޤީޤުކުރުމާއި، ވިޔަނުދިނުމާއި ދަޢުވާކުރުމާއި ގުޅޭ ފަންނީ އެހީތެރިކަން ބަދަލުކުރުމާއި ކޮރަޕްޝަންގެ ކުށް ވިޔަނުދިނުމާއި ތަޙުޤީޤު ކުރުމާ ގުޅުންހުރި މުވައްޒަފުން ތަމްރީނުކުރުން ވެސް ހިމެނެ އެވެ.
މީގެއިތުރުން ދެ ފަރާތް ގުޅިގެން ކޮރަޕްޝަން ހުއްޓުވުމާއި މަނާކުރުމާ ގުޅުންހުރި ފޯރަމްތަކާއި، ސެމިނަރތަކާއި، ކޮންފަރެންސްތަކާއި ވަރކްޝޮޕްތައް ބޭއްވުމާއި އެފަދަ ކަންކަމުގައި ބައިވެރިވުމާއި މުއައްސަސާތަކުގެ ހިންގުން ހަރުދަނާކުރުމާއި، ކޮރަޕްޝަންގެ ހިރާސް ކުޑަކުރުމަށް ކުރާ ކަންކަމުގައި އެއްބާރުލުމާއި އެހީތެރިކަންދިނުމުގެ އިތުރަށް ކޮރަޕްޝަނާ ދެކޮޅަށް މަސައްކަތްކުރުމަށް އިންޓަރޕޯލް ފަދަ މިހާރު ޤާއިމުކޮށްފައިވާ ބައިނަލްއަޤުވާމީ ނެޓްވަރކްތައް އެންމެ ފުރިހަމަ ގޮތުގައި ބޭނުންކުރުމުގައި އެހީތެރިކަން ބަދަލުކުރުން ވެސް ހިމެނެ އެވެ.