މި އަހަރުގެ މިހާތަނަށް އިންޑިއާ އިން ރާއްޖެ އަށް ޒިޔާރަތްކުރި ޓޫރިސްޓުންގެ އަދަދު ލައްކައަކާ ގާތްކޮށްފި އެވެ.
މި އަހަރުގެ ޓޫރިޒަމް އެރައިވަލްގެ އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 6 އާ ހަމައަށް އިންޑިއާ އިން އައި ޓޫރިސްޓުންގެ އަދަދަކީ 92،270 އެވެ. އެ ގައުމުން އަންނަ ޓޫރިސްޓުން މިހާރު ވަރަށް ބޮޑަށް އިތުރުވަމުން އަންނާތީ ދެން އެންމެ އަވަހަށް ރާއްޖެ އަށް މި އަހަރުގެ މިހާތަނަށް 100،000 އަށް ވުރެ ގިނަ ޓޫރިސްޓުންގެ އަދަދު ހަމަކުރާނެ ގައުމަކީ ވެސް އިންޑިއާ އެވެ.
އެ ގައުމު މިހާރު އޮތީ ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމުގެ ލިސްޓްގެ 6 ވަނައިގަ އެވެ.
މި އަހަރުގެ މިހާތަނަށް ފަސް ގައުމަކުން ވަނީ 100،000 އަށް ވުރެ ގިނަ ޓޫރިސްޓުން އައިސްފަ އެވެ. އެގޮތުން އެންމެ ގިނަ ޓޫރިސްޓުން އަންނަ ޗައިނާ އިން މި މަހުގެ 6 އާ ހަމައަށް 227،978 ޓޫރިސްޓުން އައިސްފައިވެ އެވެ. ލިސްޓްގައި ގަދަ ފަހެއްގައި ދެން ހިމެނޭ ގައުމުތަކީ ރަޝިއާ (166،172 ޓޫރިސްޓުން)، އިނގިރޭސިވިލާތް (128،262 ޓޫރިސްޓުން)، ޖަރުމަން (110،574 ޓޫރިސްޓުން) އަދި އިޓަލީ (107،799 ޓޫރިސްޓުން) އެވެ.
ރާއްޖެ އަންނަ އިންޑިއާ ޓޫރިސްޓުން އިތުރުވަމުން އަންނަ އިރު، މިދިޔަ އަހަރު އެންމެ ގިނައިން ޓޫރިސްޓުން އައީ ވެސް އެ ގައުމުންނެވެ. ނަމަވެސް މި އަހަރު ފެށުނު ފަހުން އިންޑިއާގެ ޓޫރިސްޓުން އައުން މަދުވީ މި ސަރުކާރުގެ ކުރީގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީ އާއި އެ ގައުމަށް ކުޑައިމީސްކޮށް ސޯޝަލް މީޑިއާގައި ފުރައްސާރަކުރުމާ ގުޅިގެންނެވެ.
މިކަމާ ގުޅިގެން މީގެ ރައްދު އައީ ރާއްޖޭގެ ޓޫރިޒަމް އިންޑިއާ ބޮއިޓްކުރުމުގެ ޝިއާރުތަކާ އެކީގަ އެވެ. އެގޮތުން ރާއްޖެ ދިއުމުގެ ބަދަލުގައި އިންޑިއާގެ ލަކްޝަދީޕަށް އިންޑިއާ މީހުން ޗުއްޓީ ހޭދަކުރަން ދިއުން މާ އައުލާކަން ބޮޑު ކަމަށް ބުނެ، އެތަން ޕްރޮމޯޓްކޮށް، ރާއްޖެ ބޮއިކޮޓް ކުރަން ގޮވަމުން ދިޔަ އެވެ.
އެހެންވެ އިންޑިއާގެ ފިލްމީ ތަރިން ވެސް ރާއްޖެ އައުން "އެއްކޮށް" ކަހަލަ ގޮތަކަށް ހުއްޓުނެވެ. ނަމަވެސް މިހާރު ފިލްމީ ތަރިން އަންނަ މިންވަރު ވެސް ވަނީ ވަރަށް ބޮޑަށް އިތުރުވެފަ އެވެ. ދާދި ފަހުން އިންޑިއާގައި ވަނީ ޓޫރިޒަމް ޕްރޮމޯޓްކުރަން ރޯޑްޝޯތަކެއް ވެސް ބާއްވައިފަ އެވެ.
ރާއްޖޭގެ ރައީސް ޑރ. މުހައްމަދު މުއިއްޒު މިހާރު އިންޑިއާ އަށް ކުރައްވަމުން ގެންދަވާ ދަތުރުގެ ތެރޭގައިވެސް ވަނީ އިންޑިއާ މާކެޓް ރާއްޖެ އަށް ވަރަށް މުހިއްމުކަން ފާހަގަކުރައްވައި، އެ ގައުމުގެ ވީހާ ވެސް ގިނަ ޓޫރިސްޓުން ރާއްޖެ އައުމަށް އެދިވަޑައިގެންފަ އެވެ. އަދި މުމްބާއީގައި ވެސް ވަނީ ބޮލީވުޑްގެ ފަންނާނުން ބައިިވެރިވި، ރާއްޖޭގެ ޓޫރިޒަމް ޕްރޮމޯޓްކުރުމުގެ އިވެންޓެއް ވެސް ބާއްވައިފަ އެވެ.
އެ އިވެންޓްގައި ބައިވެރިވި މަޝްހޫރު ތަރިންގެ ތެރޭގައި ޝިލްޕާ ޝެޓީ އާއި ސޮނާކްސީ ސިންހާ ފާހަގަކޮށްލެވެ އެވެ.
ރާއްޖެ އިން މި އަހަރު ޓާގެޓްކޮށްފައި އޮތީ 2 މިލިއަން ޓޫރިސްޓުން ގެނައުމެވެ. މި މަހުގެ 6 އާ ހަމައަށް އައި ޓޫރިސްޓުންގެ ޖުމްލަ އަދަދަކީ 1،522،621 އެވެ.