ޝަންގްރިއްލާ ވިލިގިލި ރިސޯޓް އެންޑް ސްޕާގެ ރަން ފިހާރައިން މިލިޔަނަށް ވުރެ ގިނަ ރުފިޔާގެ އަގުހުރި ޖަވާހިރު ވަގަށްނެގިކަމުގެ ތުހުމަތުގައި އެރަށުގައި މަސައްކަތް ކުރާ ދިވެހި 5 މުވައްޒަފަކު ހައްޔަރުކޮށްފައިވާއިިރު، އެރަށުގައި މަސައްކަތް ކުރާ ދިވެހި މުވައްޒަފުން އެންމެ ގިނައިން ދައްކާ ވާހަކަ އަކީ ރިސޯޓުގެ މެނޭޖްމެންޓުން ދިވެހި މުވައްޒަފުންނާއި މެދު ތަފާތު ކުރުންތަކެއް ގެންގުޅޭ ވާހަކައެވެ.
'އައްޑޫލައިވް'ގެ ޓީމުން ވަނީ ފާއިތުވި ހަފްތާގެ ތެރޭގައި ވިލިގިލި ރިސޯޓްގައި މަސައްކަތް ކުރާ ގިނަ އަދަދެއްގެ މުވައްޒަފުންނާއި ބައްދަލުކޮށް އެ މުވައްޒަފުންގެ ފަރާތުން މިކަމާއި ގުޅޭގޮތުން މައުލޫމާތު ހޯދާފައެވެ.
ރިސޯޓުގެ އިސްވެރިންގެ ފަރާތުން މީޑިޔާތަކަށް މައުލޫމާތު ދޭ މުވައްޒަފުން ވަޒީފާއިން ވަކިކުރާނެ ކަމުގެ އިންޒާރު ދީފައި ވަނިކޮށް ވެސް ގިނަ އަދަދެއްގެ މުވައްޒަފުން ވަނީ އެމީހުންގެ ކަންބޮޑުވުންތައް 'އައްޑޫލައިވް' އާއި ހިއްސާކޮށްފައެެވެ.
ޝަންގްރިއްލާ ރިސޯޓުގެ ރަންފިހާރަ 'ފަޅާލާފައި' ވަނީ މިމަހުގެ 2 ވަނަ ދުވަހު ދަންވަރުގެ ވަގުތެއްގައެވެ. ރިސޯޓުގެ ސެކިއުރިޓީ ބެލެހެއްޓުމުގައި މުޅިން ވެސް ބިދޭސީން ހަރަކާތްތެރިވާ އިރު ރަން ފިހާރަ ހުރި ސަރަހައްދަކީ ސީސީޓީވީ ކެމެރާ ވެސް ހަރުކޮށްފައި ހުރި ސަރަހައްދެކެވެ. އެހެން ނަމަވެސް ރަން ފިހާރަ އިން ވައްކަން ކުރި ރޭ، ސެކިއުރިޓީ ކެމެރާ ހުރީ 'އުޑަށް' އަމާޒުކޮށްފައި ކަމަށް ވެއެވެ.
އަމާޒުކޮށްފައި ހުރިކަން 'ނޭނގުމަކީ' ސެކިއުރިޓީގެ އިހުމާލެއް !
ރަށުގެ ސެކިއުރިޓީ ބެލެހެއްޓުމާއި ކެމެރާތަކުގެ މެއިންޓެނެންސް މަސައްކަތްތައް ވެސް ކުރިއަށް ގެންދަނީ ސީދާ ސެކިއުރިޓީ ބަލަހައްޓާ މުވައްޒަފުންގެ ބެލުމުގެ ދަށުންނެވެ. އެހެން ކަމުން ރަން ފިހާރަ ފަދަ މުހިއްމު ލޮކޭޝަނެއްގައި ހުރި ކެމެރާ އެއް 'އުޑަށް' އަމާޒުކޮށްފައި ހުރި ކަން ސެކިއުރިޓީ މުވައްޒަފުންނަށް ނޭނގުމަކީ އެކަމުގައި އެމީހުންގެ އިހުމާލެއް ވާކަމުގެ ހެއްކެކެވެ. އެހެން ނަމަވެސް ސެކިއުރިޓީ ބަލަހައްޓާ އެއްވެސް މުވައްޒަފަކާއި އެކަމާއި ބެހޭގޮތުން ސުވާލުކޮށްފައި ނުވާކަން 'އައްޑޫލައިވް' އަށް ވަނީ ކަށަވަރު ކުރެވިފައެވެ.
"މީގެ ކުރިން ރިސޯޓުގެ ބައެއް ތަންތަނުގައި ހުންނަ ކެމެރާތަކަށް ގެއްލުމެއް ލިބިފައި ހުއްޓާ ސެކިއުރިޓީ އިން ސީދާ ރިޕޯޓް ކޮށްފައި އެބަހުރި. އެމީހުންގެ ފަރުވާ ކުޑަކަމުން ކެމެރާ އަނބުރާފައި ހުރިކަން ނޭނގުނީ އޭ ބުނާ ވާހަކަ އަކީ ދޮގެއް" ، ޝަންގްރިއްލާ ރިސޯޓުގެ މެއިންޓެނެންސްގައި މަސައްކަތް ކުރާ (ނަން އުނިކުރެވިފައި) ބުންޏެވެ.
ޖީއެމް އަކީ، ފުލުހުންގެ "ކޮމާންޑަރު"
ރިސޯޓުގައި މަސައްކަތް ކުރާ ގިނަ މުވައްޒަފުން ރިސޯޓުގެ ޖެނެރަލް މެނޭޖަރ އަލްވިން ޑްރެގޯ ސިފަކުރަނީ ފުލުހުންގެ "ކޮމާންޑަރު" ގެ ގޮތުގައެވެ. އެމީހުން ބުނާގޮތުގައި ވައްކަމުގެ މައްސަލައިގައި ފުލުހުންގެ ބެލުމުގެ ދަށަށް ގެންދިޔަ 5 މީހުންގެ މައްޗަށް ޝައްކުކުރެވޭ ކަމަށް ބުނެ އެމީހުންގެ ނަންތައް ސީދާ ޖީއެމް ފުލުހުންނާއި ހިއްސާކޮށްފައިވާ ކަމަށެވެ. 'އައްޑޫލައިވް' ގެ ފަރާތުން މިކަން ކަށަވަރު ކުރުމަށްޓަކައި އަލްވިން ޑްރެގޯއަށް ގުޅަން މަސައްކަތް ކުރި ނަމަވެސް އެބޭފުޅާ ވަނީ އެކަމާއި ގުޅޭ ގޮތުން ވާހަކަދެއްކުމަށް ދެކޮޅު ހަދާފައެވެ.
އެހެންނަމަވެސް އިތުބާރު ހުރި ގޮތެއްގައި އެނގިފައިވާ ގޮތުގައި ފުލުހުންގެ އިންވެސްޓިގޭޝަން ފޯކަސް ކޮށްފައިވަނީ މައިގަނޑުގޮތެއްގައި ރިސޯޓުން 'ތުހުމަތު' ކުރާ މުވައްޒަފުންނަށެވެ.
" (ނަން އުނިކޮށްފައި) ޑިއުޓީ ނިންމާފައި ދަނިކޮށް ޖީއެމް ބަގީގައި ދަމުން ބުނެފި އަރާށެ. ދެން އޭނާ ބަގީއަށް އެރުމުން ގޮވައިގެން ގޮސް ހަވާލު މިކުރީ (ރިސެޕްޝަންގައި ތިބި) ފުލުހުންނާ. ފުލުހުންގެ ކޮމާންޑަރަކީ ޖީއެމް އެއްނު. ޖިނާއީ މައްސަލަތަކުގަ ހައްޔަރު މިކުރަނީ ފަރަންޖީއެއްގެ ބަހަށް "،ރިސޯޓުގައި މަސައްކަތް ކުރާތާ 3 އަހަރު ވެފައިވާ މުވައްޒަފަކު ބުންޏެވެ.
ރިސޯޓުގެ ވެރިންގެ ތުހުމަތު ވަކި ބަޔަކަށް !
ޝަންގްރިއްލާ ރިސޯޓުގެ ރަންފިހާރައިން ކުރި ވައްކަމުގެ ތުހުމަތުގައި އެ ފިހާރައިގައި މަސައްކަތް ކުރާ މުވައްޒަފާއި އަދި އެއްވެސް ސެކިއުރިޓީ އަކާއި ސުވާލުކޮށްފައި ނުވުމަކީ ޝަންގްރިއްލާ ރިސޯޓުގެ މުވައްޒަފުން އެންމެ ކަންބޮޑުވާ އެއްކަންތަކެވެ.
"ވައްކަމުގެ މައްސަލަ އެކަންޏެއް ނޫން. ބިދޭސީންނަށް މޮޅުގޮތް. ދިވެހިންނަށް ދެރަގޮތް. އަހަރުމެން ބޭނުން ދުވަހަކު އޮފް ނުލިބޭނެ. އެ ހެޔޮ އާއިލާ މީހަކު މަރު ބަލީގައި އޮތަސް. ބިދޭސީ ސްޓާފުން ރިކުއެސްޓް ކުރާއިރަށް އެކަން ހަމަޖެހޭނެ. " މުވައްޒަފަކު ބުންޏެވެ.
ސެކިއުރިޓީގައި މަސައްކަތް ކުރާ ބިދޭސީ މުވައްޒަފަކު އައްޑޫލައިވް އިން ކުރި ސުވާލަކަށް ޖަވާބު ދެމުން ބުނި ގޮތުގައި، ރަން ފިހާރަ ފަޅާލުމަކީ ވަރަށް އާދަޔާ ޚިލާފު ވައްކަމެއް ކަމަށާއި އެކަމުގައި ސެކިއުރިޓީ މުވައްޒަފުންގެ އަތެއް ނުވާނެ ކަމަށެވެ. އެހެން ނަމަވެސް ކެމެރާ އުޑަށް އަމާޒުކުރުމުގައި ސެއކިއުރިޓީގެ އިހުމާލެއް ވާކަމަށް އޭނާ ވެސް ވަނީ އެއްބަސްވެފައެވެ.
އޭނާ ބުނިގޮތުގައި ރިސޯޓްގެ ސެކިއުރިޓީ ބެލެހެއްޓުމަށް ޖުމްލަ 10 މުވައްޒަފުން ރޭގަނޑުގެ ގަޑިތަކުގައި ހަރަކާތްތެރިވާއިރު، އޭގެ ތެރެއިން 1 މުވައްޒަފަކު ސީދާ ހަރަކާތްތެރިވަމުން ދާނީ ރަން ފިހާރަ ހުރި ސަރަހައްދުގައެވެ.
އެހެން ނަމަވެސް ފުލުހުންގެ ތަހުގީގަށް އެއްވެސް ސެކިއުރިޓީ ބަލަހައްޓާ މުވައްޒަފަކާއި ސުވާލުކޮށްފައި ނުވުމާއި އަދި ވައްކަން ކުރި މަންޒަރު ސެކިއުރިޓީ ބަލަހައްޓަން އިން މުވައްޒަފަށް ނުފެނުމަކީ ވެސް ސުވާލު އުފެދޭ ކަމެކެވެ.
" ދިވެހި މުވައްޒަފުން އެކަން ނުކުރާނެ އޭ ބުނަނީ އެއް ނޫން. އެކަމަކު، ކެމެރާ ހުރި ތަނެއް، ސެކިއުރިޓީ އަކު ހުރި ތަނެއް އެއީ. ސެކިއުރިޓީގެ ބައިވެރިވުން އެކަމުގައި އޮންނާނެކަން ވަރަށް ބޮޑަށް ޤަބޫލުކުރެވޭ." ޝަންގްރިއްލާ ރިސޯޓްގެ ރެސްޓޯރަންޓްގައި މަސައްކަތް ކުރާ މުވައްޒަފަކު ބުންޏެވެ.
ދިވެހި މުވައްޒަފުން ވަނީ އަމާނާތްތެރިކަން ދައްކުވައިދީފައި !
ޝަންގްރިއްލާގެ ދިވެހި މުވައްޒަފުންގެ އަމާނާތްތެރިކަން ގިނަ ބަޔަކަށް ހާމަވެގެން ގޮސްފައިވަނީ މިދިޔަ އަހަރުގެ ޖެނުއަރީ މަހު ރައީސް އަބްދުﷲ ޔާމީން އައްޑު އަށް ކުރެއްވި ދަތުރުފުޅުގައި އެމަނިކުފާނު އެ ރިސޯޓުގައި ހުންނަވަނިކޮށް ރިސޯޓްގެ ތެރެއަށް ފިސްތޯލައެއް ގެއްލުނު ހާދިސާއިންނެވެ. ފިސްތޯލަ ގެއްލުނު ކަން އެމްއެންޑީއެފްގެ ބޭފުޅުންނަށް އެނގިފައިވަނީ ވެސް ރިސޯޓުގެ މުވައްޒަފުންތަކެއް ފިސްތޯލަ ހިފައިގެން ގޮސް ޖީއެމް އާއި ހަވާލު ކުރުމުންނެވެ. ރިސޯޓްގެ ތެރެއަށް ފިސްތޯލަ ގެއްލުނު ހާދިސާ އާއި ބެހޭ ރިޕޯޓެއް އައްޑޫލައިވް އިން ވާނީ ގެނެސްދީފައެވެ.
މީގެ އިތުރުން ވެސް ރިސޯޓަށް ޒިޔާރަތް ކުރާ ބައެއް ފަތުރުވެރިން ފުރައިގެންދާއިރު ބާއްވާފައިދާ ބައެއް އަގުބޮޑު ތަކެތި ޚުދު މުވައްޒަފުންގެ މަސައްކަތުން އެ ފަތުރުވެރިންނާއި ހަވާލުކޮށްފައި އެބަހުއްޓެވެ.
މުވައްޒަފުންނަށް ބިރުދެއްކުން !
ޝަންގްރިއްލާ ރިސޯޓުގެ މުވައްޒަފުންނަށް ދިމާވާ ކަންތަކުގެ ވާހަކަ ފޭސްބުކްގައި ނުވަތަ ސޯޝަލް މީޑިޔާގެ އެއްވެސް ވަސީލަތެއް ބޭނުންކޮށްގެން ހާމަކުރުމަކީ، ޖީއެމް އަލްވިން ޑްރެގޯ އަންގާފައިވާގޮތުގައި ކަނޑައެޅިގެން 'މަނާ' ކަމެކެވެ. އެބޭފުޅާއަށް ދިވެހިރާއްޖޭގެ ޤާނޫނު އަސާސީގައި އިސްލާމްދީންގެ އަސްލަކާއި ޚިލާފް ނުވާގޮތަށް ހިޔާލު ފާޅުކުރުމުގެ މިނިވަންކަން ލިބިފައިވާ ކަން ނޭނގެނީ ކަމަށް ވެސް ވެދާނެއެވެ. އެހެން ނަމަވެސް ހިޔާލު ފާޅުކުރުމުގެ މިނިވަން ކަމަކީ ބައިނަލްއަޤްވާމީ ހައްޤެކެވެ.
" ވެރިން ނޭދޭގޮތަކަށް ޝަންގްރިއްލާ އާއި ބެހޭ ޚަބަރެއް ފެނިގެން ލައިކް ކޮށްލި އަސް ވަަގުތުން އެޗްއާރް އަށް. ވަރަށް ބޮޑު ބލ އަކަށް މިކަން ވެއްޖެ މިހާރު. މީގެ 2 ދުވަސް ކުރިން ވެސް (ނަން އުނިކޮށްފައި) އަށް ސީދާ ގުޅާފައި އަންގައިފި ފޭސްބުކް ޕޯސްޓެއް ރިމޫވް ކުރަން " ރިސޯޓްގެ ބަގީ ޑްރައިވަރެއްގެ ވަޒީފާ އަދާކުރާ ޒުވާނަކު ބުންޏެވެ.
ދާދި ފަހުން ޝަންގްރިއްލާގެ މުވައްޒަފުންނާއި ބައްދަލުކޮށް ޖީއެމް ވަނީ ނޫސްތަކަށް މައުލޫމާތު ދޭ މުވައްޒަފުން ހޯދައި ފިޔަވަޅު އަޅާނެ ކަމުގެ އިންޒާރުވެސް ދީފައެވެ.
ޝަންގްރިއްލާގެ ދިވެހި މުވައްޒަފުން ބުނާ ގޮތުގައި ރިސޯޓުގެ އިސްވެރިންގެ ފަރާތުން ތަފާތު ކުރުންތައް ކުރިމަތި ނުވާނެ ގޮތްތަކެއް ވުމަށް އެދި ސަރުކާރުގެ ބައެއް އިސްވެރިންނަށް ވެސް ދަންނަވާފައިވާނެ ކަމަށާއި އެހން ނަމަވެސް އެބޭފުޅުންގެ ފަރާތުން އެއްބާރުލުމެއް ލިބިފައި ނުވާ ކަމަށެވެ.
"އަޅުގަނޑުމެން ގަބޫލުކުރަން ވައްކަން ކުރިކަމުގެ ތުހުމަތު ކުރެވެންޏާ ތަހުގީގު ކުރެވެން ޖެހޭނެކަން. އެކަމަކު އިންސާފުން ކުރެވެން ޖެހޭނީ. ހަމައެކަނި ދިވެހިން ގެންގޮސް ބަންދުކުރަންޏާ އެބައުޅޭ މައްސަލައެއް. " މިއީ ޝަންގްރިއްލާގެ ދިވެހި މުވައްޒަފުންގެ ފަރާތުން ދޭން ބޭނުންވާ މެސެޖެވެ.