"ލާމަރުކަޒީ ގުޅުން" ނަމުގައި އެމްޑީޕީން ހާއްސަ ކޮންފަރެންސެއް ފަށަން ނިންމައިފި އެވެ.
ރާއްޖޭގެ އެންމެ ބޮޑު ޕާޓީ އަދި މިހާރު އިދިކޮޅުގައި އޮތް ޕާޓިން ބުނީ ކޮންފަރެންސް ބާއްވަން ހަމަޖެހިފައި ވަނީ މުޅި ރާއްޖެ އަް ހާއްސަކޮށްގެން ރާއްޖޭގެ އެކި ހިސާބުތަގައި ކަމަށެވެ.
"ލާމަރުކަޒީ ގުޅުން" ކޮންފަރެންސާ ބެހޭ ގޮތުން ރާއްޖޭގެ އެކި ކަންކޮޅުތަކުގައި ބޭއްވުމަށް ހަމަޖެހިފައިވާ މި ކޮންފަރެންސާ ބެހޭގޮތުން ވާހަކަދައްކަވަމުން އެމްޑީޕީގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ ކޮންފަރެންސުގެ މައިގަނޑު ބޭނުމަކީ ލާމަރުކަޒީ ނިޒާމުގެ ބާރު ކަނޑުވާލުމަށް މި ސަރކާރުން ކުރަމުންގެންދާ ކަންކަމުގެ މައުލޫމާތު ކައުންސިލްތަކާ ހިއްސާކުރުން ކަމަށެވެ.
ކޮންފަރެންސްގެ ފުރަތަމަ ފޭސް ކުރިއަށް ގެންދަން ނިންމާފައި ވަނީ މާދަމާ އިން ފެށިގެން މި މަހުގެ 15 އާ ހަމައަށެވެ.
އެގޮތުން ބޮޑުތިލަދުންމަތީގެ ށ، ހއ އަދި ހދ އަތޮޅުގެ ރަށްތަކަށް އެމްޑީޕީގެ ޓީމުތަކެއް ދާނެ އެވެ. މި ދަތުރުތަކުގައި ޕާޓީގެ ހިންގުން ހަރުދަނާ ކުރުމާ ގުޅޭ ގޮތުން މެމްބަރުންގެ ހިޔާލު ވެސް ހޯދާނެ އެވެ.
އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒް ވިދާޅުވީ، އެމްޑީޕީގެ ވިސްނުމާއި ސިޔާސަތަކި އަބަދުވެސް ލާމަރުކަޒީ ނިޒާމުގެ ތެރެއިން ރާއްޖެ ތަރައްގީ ކުރުން ކަމަށްވާތީ މި ނިޒާމުގެ މުހިއްމުކަން ވީހާ ވެސް ބޮޑަށް އަންގައި ދޭން ބޭނުންވާ ކަމަށެވެ.