ބަތަލާ އާލިއާ ބަޓާ އެކީ ހަދަން ނިންމި ފުރަތަމަ ފިލްމު "އިންޝާﷲ" ގެ މަސައްކަތް ފެށިތަނާހެން އެ ފިލްމު ހުއްޓައިލަން ޖެހުމުން ހުނަރުވެރި ބަތަލާ ވަރަށް ރުއި ކަމަށް ޑައިރެކްޓަރު ސަންޖޭ ލީލާ ބަންސާލީ ބުނެފި އެވެ.
"ހޮލީވުޑް ރިޕޯޓާ، އިންޑިއާ" އަށް ދިން އިންޓަވިއުއެއްގައި ކުޅަދާނަ ޑައިރެކްޓަރު ބުނީ ސަލްމާން ޚާން ބަތަލުގެ ރޯލު ކުޅެން އެއްބަސްވި ފިލްމަކީ ވަރަށް އުންމީދުތަކެއް ކުރެވުނު ފިލްމެއް ކަމަށެވެ. އެގޮތުން "އިންޝާﷲ" އަށް 2021 ގައި ވަރަށް ގިނަ ތައްޔާރީތަކެއްވެ، ފިލްމުގެ ޝޫޓިން ފެށިތާ ހަފުތާއެއްހާ ދުވަހުގެ ތެރޭގައި މަސައްކަތް ހުއްޓައިލަން ޖެހުނީ ސަލްމާން އެ ފިލްމުން ވަކިވުމުންނެވެ.
ނަމަވެސް މިހާތަނަށް ވެސް "އިންޝާﷲ" ނުކުޅެން ސަލްމާން ނިންމި ސީދާ ސަބަބެއް އޮތީ ނޭނގުމެއްގެ ތެރޭގަ އެވެ.
ބައެއް ރިޕޯޓްތައް ބުނެފައިވާ ގޮތުން އޭނަ އެ ފިލްމު ދޫކޮށްލީ ޒުވާން ބަތަލާ އާލިއާއާ އެކީ ގައިގޯޅި މަންޒަރުތަކެއް ކުޅެން ޖެހޭތީ އެވެ. "އިންޝާﷲ" އަކީ އެމެރިކާ އިން އިންޑިއާ އަށް އަންނަ ދުވަސްވީ ނުފޫޒު ގަދަ ވިޔަފާވެރިއަކާއި އިންޑިއާގެ ޒުވާން ބަތަލާއަކާ ދެމެދު އުފެދޭ ގުޅުމެއްގެ މައްޗަށް ބިނާކޮށް ހަދަން ނިންމި ފިލްމެކެވެ.
މިއަށް ކުރަން ޖެހުނު ތަޖުރިބާ ހިއްސާކޮށް ބަންސާލީ ބުނީ އެންމެ ހިދްތަތިވީ "އިންޝާﷲ" ހުއްޓައިލަން ނިންމިކަން އިއުލާން ކުރުމުން އާއިލާ އަށް ލިބުނު މާޔޫސީއާ އެކީ ވަރަށް ގަދައަށް ރުއިމުން ކަމަށެވެ.
"އޭނަ ވަރަށް ރުއި. އެކަނިމާއެކަނި އިނދެގެން ވަރަށް ގަދަ އަށް ރުއި،" ބަންސާލީ ބުންޏެވެ. "ދެން އޭގެ ހަފުތާއެއްހާ ފަހުން އަހަރެން އާލިއާ އަށް ގުޅާފައި ބުނިން މިހާރު އެބައޮތޭ އެހެން ޕްރޮޖެކްޓެއް އަންނާށޭ ބައްދަލު ކުރަން."
އެ ފިލްމަކީ 2022 ގައި ރިލީޒްކޮށް، މިދިޔަ އަހަރު އާލިއާ އަށް އެންމެ މޮޅު ބަތަލާގެ ނެޝަނަލް އެވޯޑް ވެސް ލިބުނު "ގަންގޫބާއީ ކަތިއަވާޅީ" އެވެ. އެ ބައޮގްރަފިކަލް ކްރައިމް ޑްރާމާގައި އާލިއާ ކުޅުނީ މުމްބާއީގައި ކުރިން ހަށިވިއްކި އަންހެނުންތަކެއްގެ ހައްގުގައި ވަކާލާތުކުރި ގަންގޫބާއީގެ ރޯލެވެ.
"ގަންގޫބާއީ" ގެ ބޮޑު ކާމިޔާބީ އަށް ފަހު އާލިއާގެ އަތުގައި މިހާރު އަނެއްކާ ވެސް ބަންސާލީގެ ފިލްމެއް އެބައޮތެވެ. އެއީ 2026 ގައި ގެނެސްދޭން ހަމަޖެހިފައިވާ "ލަވް އެންޑް ވޯ" އެވެ. މީގެ ކާސްޓްގައި އާލިއާގެ ފިރިމީހާ ރަންބީރް ކަޕޫރްގެ އިތުރުން ވިކީ ކޯޝަލް ވެސް ހިމެނެ އެވެ.
ބޮލީވުޑްގެ މިހާރު އެންމެ ހުނަރުވެރި އަދި ކާމިޔާބު ބަތަލާއިންގެ ތެރޭގައި ހިމެނޭ އާލިއާގެ ކުރިއަށް އޮތް ފިލްމަކީ ވަސަން ބާލާ ޑައިރެކްޓްކޮށް އަންނަ ހުކުރު ދުވަހު ގެނެސްދޭ އެކްޝަން ތުރިލާ "ޖިގްރާ" އެވެ.