ބ. އަތޮޅު ކައުންސިލުން އިޔާދަކުރަނިވި ހަކަތައިގެ މަޝްރޫއެއް ފަށައިފި އެވެ.
މި މަޝްރޫއު އިއްޔެ އިފުތިތާހުކޮށް ދެއްވީ ލޯކަލް މިނިސްޓަރު އާދަމް ޝަރީފް އިބްރާހީމެވެ.
އެކަމަށްޓަކައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ބ. އަތޮޅު ކައުންސިލްގެ ފަރާތުން އެ އަތޮޅުގެ ރަށްތަކުގައި ކުރިއަށް ގެންދެވުމަށް ފެށި އިއާދަކުރަނިިވި ހަކަތައިގެ މަޝްރޫއު އަކީ ކައުންސިލެއްގެ ފަރާތުން ކުރިއަށް ގެންދާ ވަރަށް ތަހުޒީބު މަސައްކަތެއް ކަމަށެވެ.
"ބ. އަތޮޅުން އިސްނަންގަވައިގެން މި ފެއްޓެވި މަޝްރޫއުއަކީ އަޅުގަނޑު ދެކޭ ގޮތުގައި ރާއްޖޭގެ ހުރިހާ އަތޮޅުތަކަކަށް ވެސް މިއަދު މިކަން ކަމާދޭތެރޭގައި ވިސްނާ ފިކުރު ކުރައްވާ އަދި އަތޮޅުގެ ރަށްރަށް އަތޮޅުގެ ކަންކަން ކުރިއަށް ގެންދިއުމުގައި މި 21 ވަނަ ގަރުނުގައި އަޅުގަނޑުމެންގެ ވިސްނުމާއި ފިކުރު ގެންގުޅެންވީ ގޮތުގެ މައްޗަށް ރިއާޔަތްކުރުމަށް މުހިންމު ކަމެއްގެ ގޮތުގައި" މިނިސްޓަރު ވިދާޅުވި އެވެ.
އާދަމް ޝަރީފު ވިދާޅުވީ ރަށްރަށުގައި ދިރިއުޅެމުން ގެންދާ އިރު ތިމާވެއްޓަށް ލިބޭ ގެއްލުން ކުޑަކުރުމަށްޓކައި ހުރިހާ ފަރާތްތަކުން ވެސް ވިސްނަން ޖެހޭނެ ކަމަށެވެ. އަދި އެކަމަށް ޓަކައި އެމީހަކަށް ފަރުދީ ގޮތުން ކުރެވެން އޮތް ކަމެއް ކުރުން ވެސް މުހިންމު ކަމަށް ވިދާޅުވި އެވެ.
ބ. އަތޮޅު ކައުންސިލުން ފެށި އިޔާދަކުރަނި ހަކަތަ މަޝްރޫއުގެ ދަށުން އެ އަތޮޅުގެ ކޮންމެ ރަށެއްގެ ރަށުކައުންސިލް އިދާރާގައި 15 ކިލޯވޮޓްގެ ސޯލާ ޕީވީ ސިސްޓަމް ހަރުކުރަން ހަމަޖެހިފައިވެ އެވެ.