ބ. ކެންދޫގެ އާ އިންޖީނުގެ އާއި އޮފީސް އިމާރާތުގެ މަސައްކަތް ވަރަށް ބާރަށް ކުރިއަށްދާ ކަމަށް ފެނަކަ ކޯޕަރޭޝަނުން ބުނެފި އެވެ.
އެ ރަށުގައި ދެމުން އަންނަ ކަރަންޓުގެ ޚިދުމަތް ފުޅާ ކުރުމަށާއި ފެނަކައިން ދެމުން އަންނަ ހިދުމަތްތަކުގެ ފެންވަރު ރަނގަޅު ކުރުމުގެ މަގުސަދުގައި ކުރިއަށް ދާ މި މަޝްރޫޢުގެ މަސައްކަތުގެ 75 ޕަސެންޓް މިހާރު ނިމިފައިވާ ކަމަށް ވެސް އެ ކުންފުނިން ބުންޏެވެ.
އެގޮތުން،އޮފީސް އިމާރާތުގެ ދޮރުތައް ހަރުކުރުމުގެ މަސައްކަތް މިހާރު ކުރިއަށްދާ އިރު، ސީލިންގެ މަސައްކަތް އެއްކޮށް ނިމި، އާ އިންޖީނުގޭގައި މިހާރު ކުރިއަށް ދަނީ މައި ތާނގީ ބެހެއްޓުމުގެ މަސައްކަތް ކަމަށް ފެނަކަ އިން ބުންޏެވެ.
އެ ކުންފުނިން ބުނީ އަންނަ މަހުގެ ނިޔަލަށް މި މަސައްކަތްތައް އެއްކޮށް ނިންމާލުމަށް އަމާޒު ހިފާފައިވާ ކަމަށެވެ. އަދި އެ މަސައްކަތްތައް ނިމުމުން ކެންދޫގައި މިހާރު ދެމުން އަންނަ ފެނަކައިގެ ޚިދުމަތްތަކުގެ ފެންވަރު ރަނގަޅު ކުރެވި، ރަށުގެ އާއްމު ރައްޔިތުންގެ އިތުރުން ވިޔަފާރިތަކަށް ވެސް އޭގެ ފަސޭހަކަން ލިބޭ ކަމަށް ފެނަކަ އިން ބުންޏެވެ.