ކ. ގާފަރުގައި ބޭންކް އޮފް މޯލްޑިވްސް (ބީއެމްއެލް) ސެލްފް ސާވިސް ބޭންކިން އޭޓީއެމް ސެންޓަރެއް މިއަދި ހުޅުވައި ހިދުމަތް ދޭން ފަށައިފި އެވެ.
އެ ސެންޓަރުގައި އަމިއްލަ ފަރާތްތަކާއި ވިޔަފާރިތަކަށް ފައިސާ ނެގުމާއި ފައިސާ ޖަމާ ކުރުމާއި ބިލަށް ފައިސާ ދެއްކުމާއި ޓްރާންސްފާ ކުރުމުގެ ހިދުމަތް 24 ގަޑިއިރު ލިބޭނެ އެވެ.
ބީއެމްއެލްގެ ޑެޕިއުޓީ ސީއީއޯ އަދި އެތަން ހިންގުމ ވަގުތީ ގޮތުން ހަވާލުވެ ހުންނެވި އައިޝަތު ނޫރައްދީން ވިދާޅުވީ ގާފަރުގައި އަލަށް ހުޅުވި ސެލްފް ސާވިސް ބޭންކިން ސެންޓަރަކީ ކަސްޓަމަރުން ބޭނުންވާ ފަދަ ބޭންކިން ހިދުމަތެއް ފޯރުކޮށް ދިނުމަށް ކުރަމުން އަންނަ މަސައްކަތްތަކުގެ ދަށުން ހުޅުވި ތަނެއް ކަމަށެވެ.
ގާފަރުގައި ހުޅުވި އޭޓީއެމްއާ އެކު ކ. ކާށިދޫ އާއި މާފުށީގައި ގާއިމްކޮށްފައިވާ ދެ ބްރާންޗުގެ އިތުރުން ކ. އަތޮޅުގައި މީހުން ދިރިއުޅޭ އިތުރު ހަރަށެއްގައި ބީއެމްއެލްގެ އޭޓީއެމް ހިދުމަތް މިހާރު ލިބޭނެ އެވެ.
ބީއެމްއެލްއިން 20 އަތޮޅުގައި 39 ބްރާންޗާއި 89 ސެލްފް ސާވިސް ބޭންކިން ސެންޓަރުގެ އިތުރުން 144 އޭޓީއެމް އަދި ކޭޝް އޭޖެންޓުން މެދުވެރިކޮށް އަންނަނީ ހިދުމަތް ދެމުންނެވެ.