ސ.ހިތަދޫ ނޫރުލްއިސްލާމް ޖަމްޢިއްޔާއިން ކޮންމެ އަހަރަކު ރަމަޟާންމަހާ ދިމާކޮށް ހިންގަމުން ގެންދާ ރަމަޟާން އެހީ ޕްރޮގްރާމަށް އެހީތެރިކަން ފޯރުކޮށްދޭން އެދޭ ފަރާތްތަކަށް އެކަމުގެ ފުރުޞަތު ހުޅުވާލައިފިއެވެ.
މިދިޔަ އަހަރުގެ ރަމަޟާން މަހުގެ ކުރިންވެސް މި ޕްރޮގްރާމް ހިންގާފައިވާއިރު އެފަހަރު ހިތަދޫގެ ފަޤީރު 13 ޢާއިލާއަށް އެހީތެރިކަން ފޯރުކޮށްދެވިފައިވާކަމަށް ނޫރުލްއިސްލާމް ޖަމިއްޔާ އިން މައުލޫމާތު ދެއްވައެވެ. އެފަހަރު އެކިއެކި ފަރާތްތަކުގެ ދީލަތި އެހީގެ ދަށުން ކޮންމެ ޢާއިލާއަކަށް 1500 އަށް ވުރެ ގިނަ ރުފިޔާގެ ކާބޯތަކެތީގެ ބާވަތްތައް ހަދިޔާ ކުރެވިފައިވެއެވެ.
ނޫރުލް އިސްލާމް ޖަމިއްޔާގެ ފަރާތުން އައްޑޫލައިވް އަށް މަޢުލޫމާތު ދެއްވަމުން ޝެއިޚް މުޙައްމަދު އަނީލް ވިދާޅުވީ މި ޕްރޮގްރާމްގެ ދަށުން ކާޑުގެ ބާވަތްތަކާއި، އަދިވެސް ރަމަޟާންމަހު ކޮންމެހެން ބޭނުންވާނެކަމަށް ޤަބޫލުކުރެވޭ ކާބޯތަކެތީގެ ބާވަތްތައް އެ ޢާއިލާތަކަށް ފޯރުކޮށްދެވޭނެކަމަށެވެ.
މި ޕްރޮގްރާމަށް ނަންނޯޓު ކުރުމަށް ހުޅުވާލައި، 31 މާޗް 2015 ގައި މުއްދަތު ހަމަވިއިރު ނަން ނޯޓްކޮށްފައިވާ ފަރާތްތަކަކީ ޙަޤީޤަތުގައިވެސް އެހީތެރިކަމަށް ބޭނުންވާފަދަ ޢާއިލާތަކެއްތޯ ބެލުމަށް ނޫރުލް އިސްލާމް ޖަމިއްޔާގެ ވަފްދުތައް އެޢާއިލާތަކަށް ޒިޔާރަތް ކޮށްފައިވެއެވެ.
މިގޮތުން މިއަހަރު ހިތަދޫގެ އިތުރުން މި ޕްރޮގްރާމް ފޭދޫއަށް ވެސް ފުޅާކޮށްފައިވާއިރު، ޖުމްލަ 30 އަށްވުރެ ގިނަ ޢާއިލާތަކަށް އެހީތެރިކަން ބޭނުންވާކަމަށް ނޫރުލްއިސްލާމުން މައުލޫމާތު ދެއްވައެވެ.
މިއަހަރުގެ ކާބޯތަކެތީގެ އެހީގެ މަޝްރޫޢުގެ ދަށުން އެހީތެރިކަން ފޯރުކޮށްދިނުމަށްޓަކައި ޢާއިލާއަކަށް 1542 ރުފިޔާ ޚަރަދުވާނެކަމަށާއި މި ޕްރޮގްރާމްގެ ދަށުން ފަޤީރު ޢާއިލާތަކަށް އެހީތެރިކަން ފޯރުކޮށް ދެއްވަން އެދިވަޑައިގަންނަވާ ފަރާތްތަކުން 9902900 އަށް ގުޅުއްވުމަށް ނޫރުލްއިސްލާމުން އެދެއެވެ.